اسرائیل نواز ڈپٹی چیئرمین سینیٹ سلیم مانڈوی والا کی سینیٹ رکنیت فی الفور ختم کی جائے، فلسطین فاؤنڈیشن
انہوں نے مزید کہا کہ اسرائیل کے ساتھ پاکستان کو نتھی کرنے کی امریکی و عرب سازش کامیاب نہیں ہونے دیں گے۔ انہوں نے کہا کہ اگر حکومت نے اس معاملہ پر سنجیدہ اقدامات نہ کئے تو احتجاج کا راستہ اپنائیں گے۔
شیعیت نیوز: فلسطین فاؤنڈیشن پاکستان کے مرکزی سرپرست رہنماؤں بشمول سابق رکن قومی اسمبلی و رہنما جماعت اسلامی محمد حسین محنتی، نائب امیر مسلم پرویز، سابق اراکین سندھ اسمبلی محفوظ یار خان، میجر (ر) قمر عباس، پاکستان مسلم لیگ (ف) کے رہنما سردار رحیم، مجلس وحدت مسلمین سندھ کے صدر علامہ باقر زیدی، جمعیت علماء پاکستان کے رہنما علامہ قاضی احمد نورانی، پاکستان تحریک انصاف کے رہنما اسرار عباسی، پاکستان پیپلز پارٹی کے رہنما ارشد نقوی، پاکستان مسلم لیگ نواز کے رہنما پیرزادہ ازہر علی شاہ ہمدانی، پاکستان مسلم لیگ (ق) کے رہنما صادق شیخ، عوامی نیشنل پارٹی کے رہنما یونس بونیری، جمعیت علماء اسلام (ف ) کے رہنما قاری عثمان، آل پاکستان سنی تحریک کے سربراہ مطلوب اعوان قادری، معروف کشمیری سماجی رہنما بشیر سدوزئی، ہیومن رائٹس کونسل کے جمشید حسین، سوچ عورت فاؤنڈیشن کی صدر ریحانہ عزیز، پی ٹی آئی خاتون رہنما عرم بٹ اور فلسطین فاؤنڈیشن پاکستان کے سیکرٹری جنرل ڈاکٹر صابر ابومریم نے اپنے مشترکہ بیان میں ڈپٹی چیئرمین سینیٹ سلیم مانڈوی والا کے اسرائیل کی حمایت میں بیان کی شدید الفاظ میں مذمت کی ہے۔
یہ بھی پڑھیں: اہل بیت اطہارؑ کی شان میں گستاخی کرنے والے ملعون کو فوری گرفتار نہ کیا گیاتو بھرپوراحتجاج ہوگا، علامہ وحید کاظمی
فلسطین فاؤنڈیشن پاکستان کے رہنماؤں نے اراکین پارلیمنٹ، سینیٹ اور صوبائی اسمبلیوں کے اراکین سے اپیل کی ہے کہ وہ سینیٹ کے اہم ترین عہدے پر فائز سلیم مانڈوی والا کی جانب سے اسرائیل کی حمایت میں بیان پر اپنی آواز بلند کریں۔ انہوں نے کہا کہ پاکستان کی نظریاتی سرحدوں کا دفاع آئین اور پارلیمنٹ نے کرنا ہے لیکن جب پارلیمنٹ اور سینیٹ میں ہی بانی پاکستان کے مخالف نظریہ کے حامل لوگ پہنچ چکے ہوں تو پاکستان کو بیرونی دشمنوں سے کوئی خطرہ نہیں ہے۔ فلسطین فاؤنڈیشن پاکستان کے رہنماؤں نے حکومت سے مطالبہ کیا ہے کہ سلیم مانڈوی والا کو فی الفور سینیٹ کے اعلیٰ عہدے سے برطرف کیا جائے۔ ان کا کہنا تھا کہ بانی پاکستان قائداعظم محمد علی جناح کے نظریہ کا مذاق اڑانے والوں کو سخت سے سخت سزا دی جائے۔ انہوں نے مزید کہا کہ اسرائیل کے ساتھ پاکستان کو نتھی کرنے کی امریکی و عرب سازش کامیاب نہیں ہونے دیں گے۔ انہوں نے کہا کہ اگر حکومت نے اس معاملہ پر سنجیدہ اقدامات نہ کئے تو احتجاج کا راستہ اپنائیں گے۔
