ماہ صیام کی ستائیسویں شب پر اڑھائی لاکھ فلسطینیوں کی قبلہ اول آمد
شیعیت نیوز: اردن کے زیرانتظام محکمہ اوقاف کی طرف سے ماہ صیام کی ستائیسویں شب پراڑھائی لاکھ فلسطینی نمازیوں نے نماز تراویح اور رات کی عبادت میں شرکت کی۔
فلسطینی ذرائع ابلاغ کے مطابق ماہ صیام رمضان المبارک کے مقدس مہینے کی ستائیسویں شب کی خصوصی دعاؤں میں مذہبی فلسطینی نوجوانوں کی اس تعداد میں شرکت اس وقت میں ہور ہی ہے جب کہ صیہونی حکومت نے فلسطینیوں کی موجودگی سے خبردار کیا ہے۔
فلسطینی ذرائع نے مسجد الاقصی میں ادا کی گئی نماز کو شاندار اور بے مثال قرار دیا۔
بیت المقدس، اندرون فلسطین اور مغربی کنارے کے مختلف شہروں سے بڑی تعداد میں فلسطینی نمازی بدھ کے روز مسجد اقصیٰ میں داخل ہوئے۔
فلسطینی ذرائع نے اطلاع دی ہے کہ مسجد الاقصی میں نماز جمعہ کے اختتام پر دسیوں ہزار فلسطینیوں نے یروشلم اور مسلمانوں کے مقدس مقامات کی بے حرمتی پر صیہونیوں کے خلاف احتجاج کے لیے ’’خیبر، خیبر یا یہودی‘‘ کے نعرے لگائے۔
اندرون فلسطین سے 150 بسوں پرقافلہ سیکڑوں نمازیوں کو لے کرقبلہ اول پہنچا۔ زیادہ تر فلسطینی الناصرہ، طمرہ، ام الفحم، النقب اور دوسرے شہروں سےآئے۔
یہ بھی پڑھیں : یوم القدس فلسطین کی حمایت میں مذاہب کے اتحاد کی علامت ہے، برطانوی پروفیسر برشیث
دوسری طرف اسرائیلی فوج کی بھاری نفری نے شمالی بیت المقدس میں قلندیہ کے مقام پرجگہ جگہ رکاوٹیں کھڑی کرکے فلسطینیوں کو مسجد اقصیٰ پہنچنے سے روکنے کی کوشش کی۔
نمازیوں کو منتشر کرنے کے لیے پلاسٹک کی گولیوں اور آنسو گیس کا استعمال کیا۔
بعض ذرائع نے بتایا کہ جھڑپوں کے دوران درجنوں فلسطینی نمازی زخمی ہوئے۔
قابض صہیونی، مسجد الاقصی میں نماز جمعہ کے دوران تصادم کے لیے اقدامات تیز کرنے کے لیے اپنی افواج کو تیار کر رہے ہیں۔
اسرائیلی فوج کی طرف سے اٹھائے گئے اقدامات سے چوکیوں پر رش لگ گیا اور فلسطینیوں کو شدید مشکلات کا سامنا کرنا پڑا۔
بیت لحم سے القدس میں داخل ہونے والے ہزاروں فلسطینیوں کو روک دیا جس کے باعث وہ ماہ صیام کی ستائیسویں شب پر قبلہ اول پہنچنے میں ناکام رہے۔
الخلیل سے آئے ایاد ناصر الدین نے بتایا کہ انہوں نے دیکھا کہ بیت لحم کی چوکیوں پر فلسطینی شہریوں کی بڑی تعداد کو روکا گیا تھا۔ خواتین کو شدید مشکلات کا سامنا تھا اور کئی نمازی شدید گرمی کی وجہ سے بے ہوش ہوگئے تھے۔
مشکلات کے باوجود قبلہ اول میں داخل ہونے پر اس نے خوشی کا اظہار کیا۔
