سانحہ پشاور کے شہداء کے ایصال ثواب کیلئے حرم امام رضا(ع) میں مجلس ترحیم

شیعیت نیوز: سانحہ پشاور کے شہداء کے ایصال ثواب کیلئے ایران کے مختلف شہروں میں مجالس تراحیم کا انعقاد کیا گیا اور مراجع عظام و علمائے کرام کی جانب سے دہشت گردی کے اس واقعے کی پُرزور مذمت کی گئی۔

سانحہ پشاور کے شہدا کی یاد اور ان کے ایصال ثواب کیلئے حرم امام رضا علیہ السلام کی انتظامیہ کی جانب سے نماز مغربین کے بعد امام رضا علیہ السلام کے حرم مطہر کے رواق امام خمینیؒ میں قرآن خوانی اور مجلس ترحیم کا انعقاد کیا گیا، جس میں مختلف ممالک سے تعلق رکھنے والے زائرین و مجاورین نے بھرپور شرکت کی۔

اس پروگرام میں حرم امام رضا علیہ السلام کے متولی حجت الاسلام والمسلمین احمد مروی، عالمی اسمبلی اہلبیت(ع) کے جنرل سیکرٹری آیت اللہ رضا رمضانی اور کئی دیگر مذہبی و سیاسی و سماجی شخصیات نے بھی شرکت کی۔

یہ بھی پڑھیں : قومی نصاب کی تدوین کا کام دھوکے بازوں کے سپرد کیا گیا ہے، علامہ ناصر عباس جعفری

پروگرام کے آغاز میں بین الاقوامی قاریان قرآن علی رضا رضائی اور جواد قاسمی نے قرآن کریم کی تلاوت کی، جس کے بعد سانحہ پشاور کے بارے میں حرم مطہر کے متولی حجت الاسلام مروی کا بیان اردو زبان میں زائرین کیلئے پڑھا گیا، جس میں انہوں نے بڑی تعداد میں نمازیوں کی شہادت پر دلی افسوس کا اظہار کرتے ہوئے سوگوار لواحقین کو تعزیت پیش کی اور سانحہ پشاور کی مذمت کی۔

ایران کے مشہور مداح اور نوحہ خوان واعظ واعظی نے مرثیہ اور نوحہ خوانی کی اور پروگرام کے اختتام پر عالمی اسمبلی اہلبیت(ع) کے جنرل سیکرٹری آیت اللہ رضا رمضان نے مجلس سے خطاب کیا۔

یہاں یہ بات قابل ذکر ہے کہ شہدائے پشاور کے ہفتم کی مناسبت سے بھی حرم امام رضا(ع) کے رواق غدیر میں قرآن خوانی اور مجلس ایصال ثواب برپا کی گئی تھی۔

واضح رہے کہ چار مارچ کو پاکستان کے شہر پشاور کے قصہ خوانی بازار کی شیعہ مسلمانوں کی مسجد امامیہ میں نماز جمعہ کے دوران سامراجی طاقتوں کے آلہ کار دہشت گردوں نے خودکش دہشت گردانہ حملہ کرکے تقریباً 66 نمازیوں کو شہید کر دیا تھا، جن میں بچے بھی شامل تھے۔ اس سفاکانہ اور دہشت گردانہ حملے میں دو سو نمازی زخمی بھی ہوئے۔