غاصب صیہونی حکومت القدس کی ایک اور مسجد مسمار کرنے کے درپے

شیعیت نیوز: غاصب صیہونی حکومت نے القدس کی ایک اور مسجد کو مسمار کرنے کا اعلان کیا ہے تاہم مقامی فلسطینی شہریوں کی جانب سے اس مسجد کی مسماری سے متعلق صیہونی منصوبے کے خلاف بھرپور مزاحمت جاری ہے۔

فلسطینی ای مجلے عرب48 کے مطابق غاصب صیہونی حکومت نے ’’تعمیری سرٹیفکیٹ‘‘ کی عدم موجودگی کے بہانے قدس شریف کی مسجد التقوی کی مسماری کا نوٹس ایک مرتبہ پھر جاری کر دیا ہے۔

یہ بھی پڑھیں : ناجائز صیہونی حکومت کے ہاتھوں متعدد فلسطینی گاؤں 190ویں بار تباہ، 22 زخمی، 20 گرفتار

اس حوالے سے مشرقی قدس شریف کے العیسویہ محلے کی مقامی مزاحمتی کمیٹی کے رکن علی درباس نے میڈیا کو بتایا ہے کہ غاصب صیہونی حکومت کی میونسپلٹی کمیٹی نے حسب سابق اس مسجد کی مسماری سے متعلق ایک مرتبہ پھر نوٹس جاری کر دیا ہے جبکہ مقامی فلسطینی شہری اس مسجد کو کسی بھی قیمت پر شہید نہیں ہونے دیں گے!

واضح رہے کہ مذکورہ فلسطینی مسجد 300 مربع میٹر پر مشتمل ہے جس کی مزید تعمیر بھی جاری ہے جبکہ غاصب اسرائیلی فوجیوں نے 3 جنوری کے روز بھی اس مسجد پر دھاوا بول کر اسے مسمار کرنے کی کوشش کی تھی جسے مقامی فلسطینیوں کی بھرپور مزاحمت نے ناکام بنا دیا تھا۔

اس حوالے سے العیسویہ کے فلسطینیوں نے ’’ہماری مساجد کبھی مسمار نہ ہوں گی‘‘ کے عنوان سے ایک مزاحمتی کمپین بھی چلا رکھی ہے۔

یادرہے کہ صیہونی حکام عرب ریاستوں کے ساتھ سمجھوتہ کرنے کے بعد فلسطینیوں کو ہر طرح سے دبانے کی کوشش کررہے ہیں یہاں تک کہ ان کے قبرستان اور مساجد بھی صیہونیوں کے شر سے محفوظ نہیں ہیں۔