منی لانڈرنگ والے ممالک کی فہرست سے عراق کا نام خارج

شیعیت نیوز: یورپی یونین نے دہشت گردی کی مالی اعانت اور منی لانڈرنگ کرنے والے ممالک کی فہرست سے عراق کا نام خارج کردیا ہے۔

غیر ملکی میڈیا کے مطابق بغداد میں یورپی یونین کے سفیر ولی ورجولا (Ville Verjola) نے عراقی وزیر اعظم مصطفیٰ الخزیمی سے ملاقات کی۔

ملاقات کے دوران سفیر کا کہنا تھا کہ منی لانڈرنگ لسٹ (AML) اور دہشت گردی کی مالی اعانت کی فہرست (CTF) سے عراق کو خارج کیے جانے کا اقدام تعاون اور سرمایہ کاری کو فروغ دے گا۔ تاہم انہوں نے اس فیصلے کی وجہ ظاہر نہیں کی۔

مصطفیٰ الخزیمی کا کہنا تھا کہ ہم اس فیصلے کا خیر مقدم کرتے ہیں۔ یہ فیصلہ ہماری موثر سفارتی کوششوں کا نتیجہ ہے۔ انہوں نے یہ بھی کہا کہ ہم عراق کا کھویا ہوا وقار واپس لائیں گے۔

واضح رہے کہ دونوں فہرست میں عراق کا نام جولائی 2016 میں شامل کیا گیا تھا جبکہ عراقی وزیر اعظم اس سے قبل بھی یورپی یونین سے نام خارج کرنے کا مطالبہ کرچکے ہیں۔

یہ بھی پڑھیں : شہید جنرل سلیمانی امریکی منصوبے کو ناکام بنانے کی وجہ سے شہید ہوئے، شیخ خالد الملا

دوسری جانب عراقی میڈیا نے اطلاع دی ہے کہ بغداد میں امریکی سفیر ماتئو تالر نے عراقی حکومت کے قومی سلامتی کے مشیر قاسم العراجی سے ملاقات کی۔

ملاقات کے دوران، جس میں عراق میں امریکی ڈپٹی چیف آف مشن نے شرکت کی ماتئو تالر نے امید ظاہر کی کہ جلد از جلد ایک نئی عراقی حکومت تشکیل دی جائے گی۔

امریکی سفیر نے عراق کے ساتھ اپنے ملک کی شراکت داری کی اہمیت پر زور دیا اور امید ظاہر کی کہ یہ شراکت توانائی، صحت اور تعلیم جیسے مختلف جہتوں میں مزید ترقی کا مشاہدہ کرے گی۔

العراجی نے امریکی سفیر کے ساتھ علاقائی اور بین الاقوامی سیاسی اور سلامتی کی صورت حال پر بھی تبادلہ خیال کیا اور امریکی اہلکار کے ساتھ الحل کیمپ (سرحدی کیمپ جہاں داعش دہشت گرد خاندانوں کو رکھا گیا ہے) کے معاملے پر بھی تبادلہ خیال کیا۔