عراق، اربیل ایئرپورٹ پر موساد کے ٹھکانے پر خودکش ڈرون حملہ

شیعیت نیوز: عراق کے اربیل ہوائی اڈے پر ڈرون حملے کی خبروں کے بعد اب یہ انکشاف ہوا ہے کہ اس حملے میں موساد کے ٹھکانے کو نشانہ بنایا گیا ہے ۔

عراقی ذرائع ابلاغ نے بتایا ہے کہ اربیل میں موساد کے ٹھکانے پر کم سے کم دو خودکش ڈرون طیاروں سے حملہ کیا گيا ہے ۔

عراق کا کردستان علاقہ بے حد پیچیدہ ہے اور اس علاقے میں علیحدگی پسندوں سے لے کر امریکی فوجیوں اور صیہونی جاسوس تک موجود ہيں ۔

ہفتے کی شام عراقی ذرائع ابلاغ نے ، عراق کے کردستان علاقے کے اربیل ایئرپورٹ پر کئی دھماکوں کی خبر دی تھی جس کے بعد یہ خبر آئی کہ یہ حملہ امریکی اتحاد کی ٹھکانے پر کیا گيا تھا اور اس حملے کے لئے تین ڈرون طیارے استعمال کئے گئے تھے جس کی وجہ سے اربیل ہوائی اڈے کو کئی گھنٹوں کے لئے بند کر دیا گیا تھا ۔

یہ بھی پڑھیں : اقوام متحدہ کے طریقے سے یمن میں امن قائم نہیں ہو سکتا، یمنی نیشنل سالویشن حکومت

امریکی اتحاد نے اس حملے کی تصدیق کی تھی اور دعوی کیا تھا کہ حملے سے کسی طرح کا کوئی نقصان نہیں پہنچا۔

در ایں اثنا لبنان کے المیادین ٹی وی چینل نے اپنی ایک رپورٹ میں با خبر ذرائع کے حوالے سے بتایا کہ ہفتے کے روز اربیل ہوائی اڈے کے شمالی حصے میں جس مقام کو ڈرون طیاروں سے نشانہ بنایا گيا تھا وہ اسرائیل کی خفیہ ایجنسی موساد کا اڈا تھا ۔

با خبر ذرائع نے بتایا کہ موساد کے جاسوسی کے اڈے کو میزائلوں اور ڈرون طیاروں سے نشانہ بنایا گيا ۔

اس سے قبل عراقی ذرائع ابلاغ نے بتایا تھا کہ اربیل ایئرپورٹ پر امریکی فوجی اڈے سے بھیانک دھماکے کی آوازیں سنی گئی ہيں جبکہ کردستان -24 ٹی وی نے بتایا تھا کہ یہ حملہ کم سے کم تین ڈرون طیاروں سے کیا گيا تھا ۔

اربیل میں اس سے پہلے بھی موساد کے خفیہ ٹھکانے پر حملہ ہو چکا ہے ۔