ان شاءاللہ یکم اگست کو قائد شہید ؒ کی برسی کا اجتماع حسینیوں کی عزت و سربلندی اور قومی بیداری کا دن ہوگا،علامہ مقصود ڈومکی
انہوں نے کہا کہ مجلس وحدت مسلمین پاکستان قائد شہید کے پاکیزہ افکار اور اعلیٰ اقدار کی امین ہے
شیعیت نیوز: مجلس وحدت مسلمین پاکستان کے مرکزی ترجمان علامہ مقصود علی ڈومکی نے کہا ہے کہ قائد شہید علامہ سید عارف حسین الحسینی کی تینتیسویں برسی کے موقع پر ان کے عظیم اھداف سے تجدید عہد کرتے ہوئے اعلان کرتے ہیں قائد شہید کے مشن کو جاری رکھیں گے۔ فرزند خمینی علامہ سید عارف حسین الحسینی وطن عزیز پاکستان میں سامراج مخالف جدوجہد کی علامت اور اسلام ناب محمدی کے علمبردار تھے۔ آپ نے بہ یک وقت باطل یزیدی قوتوں کے خلاف چومکھی لڑائی لڑی ایک طرف شیطان بزرگ امریکہ کے انسان دشمن سامراجی عزائم کے خلاف آپ نے عوام میں شعور بیدار کیا تو دوسری طرف نام نہاد خادم الحرمین الشریفین کے اسلام دشمن منافقانہ کردار کو بے نقاب کیا۔
یہ بھی پڑھیں: علامہ راجہ ناصرعباس 25 جولائی کوکراچی میں دفاع عزاداری کانفرنس سے خطاب کریں گے
شہید قائد نے ضیائی آمریت اور اس کے جھوٹے وعدوں کی مخالفت کرتے ہوئے آپ نے ضیاء الباطل کا مکروہ چہرہ بے نقاب کیا۔ قائد شہید ،نائب امام ولی فقیہ رہبر کبیر حضرت امام خمینی رحمۃ اللہ علیہ کے باوفا ساتھی تھے آپ نے دانا دشمن اور نادان دوستوں کی سازشوں اور حماقتوں کے باوجود صراط مستقیم یعنی خط خمینی پر کبھی سودے بازی نہیں کی۔ آپ نے دین اسلام اور نظام ولایت کی راہ میں اپنے پاکیزہ خون کا نذرانہ پیش کیا اور آپ نے اپنی صداقت کی گواہی شہادت کی صورت میں اپنے خون سے دی۔
یہ بھی پڑھیں: JDC فاونڈیشن پاکستان کے زیر اہتمام اجتماعی قربانی ہزاروں ٹن گوشت مستحقین میں تقسیم
انہوں نے کہا کہ مجلس وحدت مسلمین پاکستان قائد شہید کے پاکیزہ افکار اور اعلیٰ اقدار کی امین ہے۔ ایم ڈبلیو ایم کے زیر اہتمام قائد شہید کی 33 ویں برسی کے موقع قرآن و اہلبیت کانفرنس کا انعقاد ملت کو در پیش مسائل کے حل کے لئے سنگ میل کی حیثیت رکھتا ہے۔ ان شاءاللہ یکم اگست قائد شہید کی برسی کا اجتماع حسینیوں کی عزت و سربلندی اور قومی بیداری کا دن ہوگا۔
