زائرین کربلا و نجف کیلئے خوشخبری، حکومت پاکستان نے بڑا فیصلہ کرلیا

شیعیت نیوز: زائرین کربلا و نجف کیلئے خوشخبری، حکومت پاکستان نے بڑا فیصلہ کرلیا۔ پاکستانی وزیر خارجہ مخدوم شاہ محمود قریشی کی وزارتِ داخلہ عراق آمد، جہاں عراق کے وزیر داخلہ جناب عثمان الغانمی نے وزیر خارجہ کا خیرمقدم کیا، وزیر خارجہ کی عراقی وزیر داخلہ کے ساتھ ملاقات۔

اس موقع پر وزیر خارجہ نے کہا کہ پاکستان عراق کے ساتھ دوطرفہ تعلقات کو خصوصی اہمیت دیتا ہے۔ پاکستان اور عراق کے مابین یکساں مذہبی، ثقافتی اور تاریخی بنیادوں پر استوار دیرینہ برادرانہ تعلقات ہیں۔ پاکستانی مذہبی اعتبار سے عراق کے ساتھ گہری دلی وابستگی رکھتے ہیں، وزیر خارجہ نے مزید کہا کہ ہر سال دو لاکھ سے زائد ہر مسلک سے تعلق رکھنے والے پاکستانی زیارات مقدسہ کیلئے عراق آتے ہیں۔ وزیراعظم عمران خان کے ویژن کے مطابق زائرین کی سفری مشکلات کے ازالے اور انہیں مناسب سہولیات کی فراہمی کیلئے زائرین مینجمنٹ پالیسی "متعارف کروا رہے ہیں۔ زائرین مینجمنٹ پالیسی پر موثر عملدرآمد کیلئے ہمیں عراقی حکومت کی معاونت درکار ہوگی۔

وزیر خارجہ نے پاکستانی زائرین کیلئے ویزوں کے حصول میں آسانی پیدا کرنے کی جانب توجہ مبذول کرائی، انہوں نے کربلا میں پاکستانی قونصلیٹ اور میڈیکل سینٹر کے قیام کی کوششوں کا بھی ذکر کیا۔ انہوں نے کہا کہ عراق کی طرح پاکستان نے بھی دہشت گردی کے عفریت کو کچلنے کیلئے ایک طویل جنگ لڑی ہے۔ دہشتگردی کے خلاف جنگ میں پاکستان کو کثیر مالی و جانی نقصان سے گزرنا پڑا۔ دہشتگردی سے موثر انداز میں نمٹنے کیلئے دونوں ممالک ایک دوسرے کے تجربات سے استفادہ حاصل کرسکتے ہیں۔

عراقی وزیر داخلہ عثمان الغانمی نے وزیر خارجہ کو وزارت داخلہ عراق آمد پر خوش آمدید کہتے ہوئے کرونا وبا کے دوران عراقی بھائیوں کیلئے پاکستان کی جانب سے کی گئی معاونت پر پاکستانی قیادت و عوام کا شکریہ ادا کیا، عراقی وزیر داخلہ نے وزیر خارجہ مخدوم شاہ محمود قریشی کو باہمی دلچسپی کے امور پر ہر ممکن تعاون کی یقین دہانی کروائی۔