سعودی عرب کی یمن پر جارحیت، الحدیدہ میں 120 بار جنگ بندی کی خلاف ورزی

شیعیت نیوز: یمنی فوج کا کہنا ہے کہ سعودی اتحاد کے آلۂ کاروں نے گزشتہ 24 گھنٹوں کے دوران الحدیدہ میں 120 بار جنگ بندی کی خلاف ورزی کرتے ہوئے مختلف علاقوں پر گولہ باری کی ہے۔

تسنیم کی رپورٹ کے مطابق گزشتہ 24 گھنٹوں کے دوران یمن کے صوبے الحدیدہ پر جارح سعودی اتحاد کےجنگی طیاروں اور ڈرون نے پروازیں کیں، توپوں کے گولے اور میزائل داغے اور بھاری اور ہلکے ہتھیاروں سے حملے کر کے 120 مرتبہ جنگ بندی کی خلاف ورزی کی۔

یمن کے خلاف جنگ اور جارحیت کا سلسلہ ایسے وقت میں جاری ہے جب سوئیڈن میں صنعاء اور ریاض کے وفد کے مابین 18 دسمبر 2018 کو الحدیدہ میں جنگ بندی کا معاہدہ طے پایا تاہم سعودی جنگی اتحاد نے اپنی ہی اعلان کردہ جنگ بندی کی ایک دن بھی پابندی نہیں کی۔

دوسری جانب یمنی فوج اور رضاکار فورس نے ایک بار اپنی طاقت کا مظاہرہ کیا اور سعودی عرب کے ایک اور ڈرون طیارے کو مار گرایا۔

یہ بھی پڑھیں : سعودی نائب وزیر دفاع کی امریکی کمانڈر سے ملاقات، علاقے میں نیا فتنہ کھڑا کرنے کی کوشش

یمنی فورس کے پاس محدود امکانات ہیں لیکن اس کے باوجود وہ جارح سعودی اتحاد کو زبردست ٹکر دے رہی ہے اور اتنا عرصہ گزرنے کے باوجود سعودی اتحاد ابھی تک کوئی خاص کامیابی حاصل نہیں کر سکا ہے۔

اس سے دو دن پہلے بھی یمنی فورس نے سعودی اتحاد کو چین سے خریدے گئے ایک پیشرفتہ ڈرون کو مار گرایا تھا۔ اس ڈرون کو گرانے کے لئے جس میزائل کا استعمال کیا گیا تھا اس کی رونمائی تک نہیں ہوئی ہے۔

واضح رہے کہ سعودی عرب اور اس کے بعض اتحادی ممالک، امریکہ اور دیگر مغربی ملکوں کی حمایت کے زیر سایہ مارچ دو ہزار پندرہ سے یمن پر وحشیانہ حملے کر رہے ہیں اس عرصے میں دسیوں ہزار یمنی شہری شہید و زخمی جبکہ دسیوں لاکھ یمنی بے سر و سامانی کی زندگی گزارنے پر مجبور ہو گئے ہیں۔

سعودی عرب اپنے تمام تر وحشیانہ حملوں کے باوجود اپنا ایک بھی مقصد اب تک حاصل نہیں کر سکا ہے۔