یورپ میں اسلاموفوبیا ، نیدرلینڈز میں ایک زیرتعمیر مسجد نذر آتش

شیعیت نیوز: یورپی ملک نیدرلینڈز میں ایک زیرتعمیر مسجد کو آگ لگادی گئی۔

رپورٹ کے مطابق یہ افسوس ناک واقعہ نیدرلینڈز کے مغربی شہر گاؤڈا میں جمعہ اور ہفتے کی درمیانی شب پیش آیا۔ آتش زدگی کے نتیجے میں مسجد کی عمارت کو نقصان پہنچا۔

عینی شاہدین کا کہنا ہے کہ ایک شخص نے آتش گیر مادہ چھڑک کر مسجد کو آگ لگائی۔

مقامی پولیس کا کہنا ہے کہ اس نے ایک 40 سالہ غیرمقامی باشندے کو حراست میں لے لیا ہے۔ مقامی مسلمان تنظیم کے نائب سربراہ فرید حبیبی نے بتایا کہ آتش زدگی کا شکار ہونے والی مسجد سلام میں تعمیر کا کام تکمیل کے مراحل میں تھا۔

اس حملے کی مذمت کرتے ہوئے نیدرلینڈ کی اسلامی انجمن کے نائب صدر نے کہا کہ اس مسجد کی تعمیر تقریبا مکمل ہوچکی تھی تاہم اس اسلاموفوبیا حملے نے ہمیں شدید متاثر کیا اور پریشان کیا۔

فرید حبیبی نے مزید کہا کہ پولیس میں شکایت درج کی گئی ہے، انہوں نے مزید کہا کہ پولیس نے اس واقعے کی تفتیش شروع کردی ہے،درایں اثنا ڈچ پولیس نے بھی اعلان کیا کہ گذشتہ رات 03 بجے ایک چالیس سالہ شخص نے اس مسجد کو نذر آتش کیا۔

یہ بھی پڑھیں : سعودی عرب میں فلسطینیوں کی گرفتاری بلاجواز ہے، حماس

دوسری جانب سوئیڈن میں اسلامو فوبیا کے باعث حملوں کا سامنا کرنے والوں کو اکثر دھمکیاں دی جاتی ہیں اور ہراساں کیا جاتا ہے۔

اس تناظر میں سوئیڈش کرائم انویسٹی گیشن کونسل نے 2016ء سے 2018ء کے دوران اسلام دشمنی پر مبنی حملوں کا سامنا کرنے والے 500 افراد سے متعلق رپورٹ حکومت کو پیش کردی۔ رپورٹ میں بتایا گیا ہے کہ ان حملوں کا نشانہ بننے والوں کی اکثریت کو دھمکیوں اور ہراسانی کا سامنا رہا ہے۔

گرین پارٹی کی شریک چیئر پرسن اور امور مساوات کی وزیر مارٹا اسٹینیوی نے اس رپورٹ کے بارے میں اپنے جائزے میں کہا کہ مسلمان خواتین پر کس طرح حملہ کیا گیا، ان کے سر سے اسکارف کو جبراً ہٹا کر زمین پر پھینک دیا گیا، ان کے چہروں پر تھوکا گیا اور انہیں توہین کا نشانہ بنایا گیا۔ میرے نزدیک یہ تمام حرکات دہشت ناک ہیں ۔