ترکی نے عرب لیگ کے وزرائے خارجہ کے الزامات کو مسترد کردیا

شیعیت نیوز: ترکی نے عرب لیگ کی وزرائے خارجہ کونسل کے اجلاس میں انقرہ حکومت کے خلاف کیے گئے فیصلوں کو یکسر مسترد کرنے کا اعلان کیا ہے۔

ترکی نے عرب لیگ کو علاقے کی فلاح و بہبود اور خطے میں سلامتی و استحکام کے لئے کام کرنے کا مشورہ دیا ہے۔

ترک وزارت خارجہ کی جانب سے جاری تحریری بیان میں کہا گیا ہے کہ 3 مارچ کو عرب لیگ کے وزرائے خارجہ کونسل کے اجلاس میں ترک مخالف اور بے بنیاد فیصلوں کو مکمل طور پر مسترد کرتے ہیں۔

بیان کے مطابق ان فیصلوں میں عرب عوام کی کوئی نمایندگی نہیں ہے۔ عرب لیگ کے ارکان بخوبی جانتے ہیں کہ کچھ تباہ کن سرگرمیوں کو چھپانے کے لیے ترکی پر الزام تراشیاں کررہے ہیں جن کی عرب عوام کی نظر میں کوئی اہمیت نہیں ہے۔

یہ بھی پڑھیں : عالمی عدالت کی جانب سے بنجمن نیتن یاہو کو گرفتار کر لئے جانے کا خطرہ

ترک وزارت خارجہ کے بیان میں کئی ارکان کی جانب سے ان فیصلوں پر اعتراض کیے جانے کی بھی نشاندہی کی گئی ہے۔ کونسل نے اعتراضات کے باوجود شفاف مذاکرات کے عمل کے بغیر مختلف ممالک کے بیانیے کو جگہ دی ہے۔

ترک اعلامیے میں کہا گیا ہے کہ ترکی، دنیا اور خطے میں اپنے اصولی اور مستحکم مؤقف، سلامتی اور امن و استحکام کی بحالی کے لیے سب سے زیادہ کوششیں کرنے والے ممالک میں سر فہرست ہے۔

عرب لیگ ترکی پر بے بنیاد الزامات لگانے کے بجائے امن، خوشحالی اور فلاح و بہبود کو ترجیح دے اور خطے میں سلامتی اور استحکام کے قیام میں تعمیری کردار ادا کرے۔

دوسری جانب ترکی کے وزیردفاع خلوصی آقار نے کہا ہے کہ گزشتہ روز فوجی ہیلی کاپٹر کو پیش آنے والے حادثے کی اہم وجہ موسم کی خرابی تھی۔

صوبہ الازیغ کی 8 ویں کور کمانڈ میں گفتگو کرتے ہوئے وزیر دفاع نے کہا کہ ابتدائی معلومات اور عینی شاہدین کے مطابق حادثہ موسمی حالات میں اچانک تبدیلی کے باعث پیش آیا، تاہم مزید تحقیقات کے بعد حادثے کی حتمی وجہ کا تعین کیا جائے گا۔

وزارت دفاع کا کہنا ہےکہ جمعرات کے روز صوبہ بتلیس کے مشرقی قصبے تاتوان میں ایک کارگو ہیلی کاپٹر گر کر تباہ ہو گیا جس میں 11 فوجی ہلاک ہوئے۔