ہنگامی خدشات کے باعث امریکی ایوان نمائندگان کا اجلاس منسوخ

شیعیت نیوز: امریکہ کے ایوان نمائندگان کے آج ہونے والے اجلاس کو ہنگاموں کے خدشات کے باعث منسوخ کردیا گیا ہے۔

امریکی پولیس نے کہا ہے کہ کیپٹل بلڈنگ پر انتہا پسند گروپ کے حملے کی اطلاعات سامنے آئی تھیں جس کے بعد کیپٹل ہل اور اطراف کی سیکیورٹی بڑھادی گئی ہے۔ تاہم کشیدگی بڑھنے اور ممکنہ طور پر ہنگامہ آرائی سے بچنے کیلئے جمعرات کو ہونے والا اجلاس منسوخ کر دیا گیا۔

دوسری جانب امریکی کانگریس کی عمارت کے کے اررد گرد حفاظتی انتظامات ایک بار پھر سخت کر دیئے گئے ہیں۔

کانگریس کی حفاظت پر مامور خصوصی پولیس اسکواڈ کے جاری کردہ بیان کے مطابق، گزشتہ ہفتے کے دوران ملنے والی بعض تشویشناک رپورٹوں کے بعد حفاظتی انتظامات میں اضافہ کردیا گیا ہے۔

پولیس کے مطابق اسے خطرہ ہے کیو اینان نامی گروپ کانگریس کی عمارت پر ہلہ بول سکتا ہے جس نے چار مارچ کو صدر ڈونلڈ ٹرمپ کی تقریب حلف برداری کا اعلان کر رکھا ہے۔

یہ بھی پڑھیں : امریکہ یمن میں جاری ظلم کا اصل ذمہ دار ہے، سعید خطیب زادے

سیکورٹی حکام کا کہنا ہے کہ اگر چہ ابھی تک انہیں تشدد پسند گروہوں کے واشنگٹن میں داخلے کے مصدقہ شواہد نہیں ملے تاہم کانگریس کے گرد حفاظتی انتظامات میں پیشگی اضافہ کردیا گیا ہے۔

واضح رہے کہ چھے جنوری کو امریکی کانگریس پراس وقت حملہ کیا گیا تھا جب وہاں موجودہ صدر جوبائیڈن کی کامیابی کی توثیق کے لئے کانگریس کا اجلاس ہورہا ہے تھا اور سابق صدر ڈونلڈ ٹرمپ اپنی شکست تسلیم کرنے کو تیار نہیں تھے۔ کہا جارہا ہے کہ ڈونلڈ ٹرمپ نے اپنے بیانات اور انتخابات میں دھاندلی کے دعوے کرکے اپنے حامیوں کو کانگریس پر حملے کے لیے اکسایا تھا۔

دریں اثنا امریکہ کے سابق صدر ڈونلڈ ٹرمپ نے امریکی سپریم کورٹ کو شدید تنقیدکا نشانہ بنایا۔ اطلاعات کے مطابق سابق امریکی صدر ڈونلڈ ٹرمپ نے کنزرویٹو پولیٹیکل ایکشن کانفرنس سے خطاب میں امریکی سپریم کورٹ پر شدید تنقید کی۔

ذرائع کے مطابق ٹرمپ کو کیپٹل ہل حملہ آوروں کو جھوٹ بول کر بھڑکانے پر کوئی ملال نہیں۔ رپورٹ کے مطابق ٹرمپ نے اگلے الیکشن میں حامیوں کے ذریعے ووٹنگ کی حوصلہ شکنی کی بات کہی۔

امریکی میڈیا کے مطابق سابق امریکی صدر کی تقریر کا مقصد اپنے حامیوں کو بظاہر مزید انتہا پسند بنانا تھا۔ سابق امریکی صدر ڈونلڈ ٹرمپ نے 2024ء کا صدارتی الیکشن لڑنے کا اشارہ بھی دیا۔