روس اور ایران کے مابین تعلقات کا انحصار امریکہ کی خواہشات پر نہیں ہوگا، سرگئی لاوروف
شیعیت نیوز: روسی وزیر خارجہ سرگئی لاوروف نے کہا کہ ان کے ملک اور ایران کے مابین تعلقات کا انحصار امریکہ کی خواہشات پر نہیں ہوگا۔
غیر ملکی نیوز ایجنسی کے مطابق روسی وزیر خارجہ سرگئی لاوروف نے پریس کانفرنس سے خطاب کرتے ہوئے کہا کہ روس اور ایران کے مابین تعلقات کا انحصار امریکہ کی خواہشات پر نہیں ہوگا جو غیر قانونی پابندیاں عائد کرکے دونوں ممالک کے مابین شراکت کو نقصان پہنچانے کی کوشش کر رہا ہے۔
لاوروف نے اپنے ایرانی ہم منصب محمد جواد ظریف کے ساتھ مشترکہ کانفرنس کے دوران کہا کہ ہمارے تعلقات دونوں ممالک کے مفادات کی بنیاد پر ترقی کر رہے ہیں اور ہم کسی تیسری پارٹی کی طرف دیکھے بغیر اپنے منصوبے بناتے ہیں۔
لاوروف نے کہا کہ کچھ بین الاقوامی ’کھلاڑی‘ ماسکو اور تہران کے مابین غیر قانونی طریقوں سے باہمی تعاون کو محدود کرنے کی کوشش کر رہے ہیں جو بین الاقوامی قانون کے منافی ہے۔
یہ بھی پڑھیں : امریکی پارلیمنٹ پر حملہ کرنے والے 150 افراد پر الزامات عائد ، 20 سال کی سزا
دوسری جانب روس کے دفتر خارجہ کی ترجمان ماریہ زاخارووا نے اعلان کیا ہے کہ روسی شہروں میں غیر قانونی احتجاجات کے بارے میں غلط معلومات فراہم کرنے کی بنا پر امریکی سفارت کاروں کو وزارت خارجہ میں طلب کئے جانے کا فیصلہ کیا گیا ہے۔
انہوں نے کہا ہے کہ روس میں امریکی سفارت کاروں نے مختلف شہروں میں غیر قانونی احتجاجات کئے جانے کے بارے میں افواہیں پھیلائی ہیں اور اسی بنا پر ان امریکی سفارت کاروں کو وزارت خارجہ طلب کیا جائے گا۔
روسی وزارت خارجہ کی ترجمان نے کہا کہ ان امریکی سفارت کاروں سے افواہیں پھیلانے پر وضاحت طلب کی جائے گی۔
ماریا زاخا رووا نے کہا کہ روس میں امریکی سفارت کاروں نے یہاں تک افواہ پھیلائی ہے کہ احتجاج کرنے والے مظاہرین کرملین ہاؤس میں داخل ہوئے ہیں۔
انہوں نے کہا کہ امریکی سفارت کار اپنی سفارتی سرگرمیوں کے دائرے سے باہر ہوئے ہیں جس پر انہیں روس کے ردعمل کا سامنا کرنا پڑے گا۔
ماسکو میں امریکی سفارت خانے نے ہفتے کے روز اپنی ویب سائٹ پر روس کے بیس شہروں میں احتجاج کئے جانے کی خبر دیتے ہوئے امریکی شہریوں سے اپیل کی تھی کہ وہ ان مظاہروں میں شرکت کرنے سے گریز کریں۔
واضح رہے کہ الیکسی ناوالنی کے ہزاروں حامیوں نے روس کے بعض شہروں میں احتجاجی مظاہرہ کرتے ہوئے ناوالنی کو رہا کئے جانے کا مطالبہ کیا ہے۔
