عراق: تحریک الصادقون کی استقامتی محاذ کے کمانڈروں کی راہ جاری رکھنے پر تاکید

شیعیت نیوز: عراق کی تحریک الصادقون کے ترجمان نے عراق کی عوامی رضاکار فورس حشدالشعبی کے عہدیداروں کے خلاف امریکہ کی جانب سے عائد کی جانے والی پابندیوں پر اپنے ردعمل کا اظہار کرتے ہوئے کہا ہے کہ حشدالشعبی محاذ استقامت کے عظیم شہید کمانڈروں شہید قاسم سلیمانی اور شہید ابو مہدی المہندس کی راہ جاری رکھے گی۔

عراق کی تحریک الصادقون کے سیاسی دفتر کے ترجمان محمود الربیعی نے ایک ٹوئٹ میں لکھا ہے کہ امریکہ کی جانب سے دہشت گردوں کی نام نہاد فہرست میں عراق کی عوامی رضاکار فورس حشدالشعبی کے ایک اور کمانڈر ابو فدک المحمداوی کا نام شامل کیا جانا عزت و شرافت کے ساتھ ساتھ ایک ایوارڈ کے بھی مترادف ہے۔

یہ بھی پڑھیں : آئی ایس او سال 2021کو احیائے علم و عمل و استحکام تنظیم کے عنوان سے منائے گی، عارف الجانی

تحریک الصادقون کے ترجمان نے کہا کہ ابو فدک اور عراق کی عوامی رضاکار فورس حشدالشعبی نیز محاذ استقامت کے تمام کمانڈروں نے اس بات کو ثابت کر دیا ہے کہ وہ محاذ استقامت کے دو عظیم شہید کمانڈروں، شہید جنرل قاسم سلیمانی اور شہید جنرل ابو مہدی المہندس کی راہ پر گامزن ہیں۔

عراق کی عوامی رضاکار فورس حشدالشعبی کے سربراہ فالح الفیاض نے بھی عراق کی عوامی رضاکار فورس حشدالشعبی کے ایک کمانڈر ابو فدک المحمداوی کا نام دہشت گردوں کی امریکی فہرست میں شامل کئے جانے کو عراق کے اقتدار اعلی اور اس ملک کی آزادی و خودمختاری کے منافی قرار دیا ہے۔

انھوں نے کہا ہے کہ عراق کی عوامی رضاکار فورس حشدالشعبی اس ملک کی مسلح افواج کا حصہ ہے جو عراق کی مسلح افواج کے کمانڈر یعنی اس ملک کے وزیراعظم کی ہدایات پر عمل کرتی ہے۔ فالح الفیاض نے کہا کہ عراق کی حکومت اور اس ملک کو چاہئے کہ امریکہ کی جانب سے عراق کے اقتدار اعلی کے منافی اقدامات کا مقابلہ کرے۔

یہ بھی پڑھیں : امریکہ دہشت گردی کا مقابلہ کرنے والوں کو نشانہ بنا رہا ہے، عراقی سیاسی دھڑے

حزب اللہ عراق نے بھی ایک بیان میں امریکہ کی جانب سے عراق کی عوامی رضاکار فورس حشدالشعبی کے عہدیداروں کے خلاف پابندیوں کو محاذ استقامت کے مقابلے میں شکست پر امریکہ کی بوکھلاہٹ کی علامت قرار دیا اور کہا کہ امریکہ اپنے اس طرح کے اقدامات پر پشیمان ہو گا۔

حزب اللہ عراق نے کہا ہے کہ بڑے شیطان امریکہ کی حکومت، جو زبردستی اور دہشت گردی کی بنیاد پر اقوام عالم پر مسلط ہوئی ہے، ان اقوام کے نوجوانوں اور حریت پسندوں کے مقابلے میں خوف و ہراس میں مبتلا ہے اس لئے کہ محاذ استقامت کے جیالوں اور بہادروں نے امریکی استکبار کو ناکوں چنے چبوادیئے ہیں۔

یہ بھی پڑھیں : سعودی اتحاد ٹرمپ کے انجام سے عبرت لے، ترجمان انصار اللہ

امریکی وزارت خزانہ نے بدھ کے روز عراق کی عوامی رضاکار فورس حشدالشعبی کے ڈپٹی کمانڈر شہید ابو مہدی المہندس کے جانشین، جنرل ابو فدک المحمداوی کا نام دہشت گردوں کی اپنی نام نہاد فہرست میں شامل کر کے ان کے خلاف پابندیاں عائد کرنے کا اعلان کیا ہے۔ عراق کی عوامی رضاکار فورس حشدالشعبی نے بھی اپنے ایک کمانڈر ابو فدک المحمداوی کا نام امریکہ کی نام نہاد فہرست میں شامل کئے جانے پر ابو فدک المحمداوی کو مبارک باد پیش کی ہے۔امریکی وزارت خزانہ نے گذشتہ ہفتے بھی عراق کی عوامی رضاکار فورس حشدالشعبی کے سربراہ فالح الفیاض کا نام دہشت گردوں کی اپنی نام نہاد فہرست میں شامل کیا تھا جس پر عراق کی حکومت اور تمام سیاسی جماعتوں نے سخت ردعمل کا اظہار کیا ہے۔