امریکہ دہشت گردی کا مقابلہ کرنے والوں کو نشانہ بنا رہا ہے، عراقی سیاسی دھڑے

شیعیت نیوز: عراق کے سیاسی دھڑے نے حکومت قانون نے زور دے کر کہا ہے کہ ملک سے امریکی فوجیوں کے انخلاء سے مشرق وسطیٰ کا سب سے بڑا بحران ختم ہو جائے گا۔

عراقی پارلیمنٹ میں حکومت قانون دھڑے کے رکن رعد الماس نے کہا ہے کہ عراقی حکومت کو چاہئے کہ انتخابات سے پہلے ملک سے امریکی فوجیوںکے انخلاء کے بل پر تیزی سے عمل درآمد شروع کر دے۔

انہوں نے کہا کہ عراق کی سبھی قومی پارٹیاں ملک میں امریکی فوجی موجودگی کے خطرے سے واقف ہیں اور امریکی فوجی، سیکورٹی ایجنسیوں اور حشد الشعبی کے دسیوں جوانوں خاص طور سے فاتح کمانڈروں کے قتل میں ملوث رہے ہیں۔

یہ بھی پڑھیں : داعش کو امریکی اسلحے کی فراہمی کے بارے مکمل تحقیقات کروائی جائیں، سید جبار المعموری

واضح رہے کہ سردار محاذ استقامت سپاہ قدس کے کمانڈر شہید جنرل قاسم سلیمانی اور حشد الشعبی کے ڈپٹی کمانڈر شہید جنرل ابومہدی المہندس کی شہادت کے بعد عراقی پارلیمنٹ نے ملک سے امریکی دہشت گردوں کے باہر نکلنے کے بل کو منظوری دے دی تھی۔

عراقی حکام اورعوام بھی مختلف مواقع پر پارلیمنٹ کے منظورشدہ بل پر عمل درآمد کے تناظر میں عراق سے امریکہ کے باوردی دہشت گردوں کے انخلا پر زور دیتے رہے ہیں۔

اس درمیان عراق کی رضاکار فورس حشد الشعبی نے اپنے کمانڈروں کا نام امریکہ کے ذریعے بلیک لسٹ کئے جانے کو دہشت گردی کے خلاف جدوجہد کرنے والے گروہوں کے ساتھ واشنگٹن کی دشمنی کا تسلسل قرار دیا۔ حشد الشعبی نے اپنے بیان میں نائب سربراہ جنرل ابو فدک المحمداوی کو امریکہ کی جانب سے بلیک لسٹ میں شامل کئے جانے پر مبارکباد بھی پیش کی۔

یہ بھی پڑھیں : مسجد اقصیٰ کے انتظامی امور میں اسرائیلی مداخلت مذہبی جارحیت ہے، عمر الکسوانی

بیان میں آیا ہے کہ امریکہ، داعش اور دیگر تمام دہشت گرد گروہوں کا قلع قمع کرنے اور ان کے خاتمے میں کردار ادا کرنے والوں کو نشانہ بنا رہا ہے۔

عراق کے سیاسی دھڑے عصائب اہل الحق تحریک نے بھی ایک بیان میں کہا ہے کہ الحشد الشعبی کہ جس نے دہشت گردی کو دھول چٹائی اور اسے شکست سے دوچار کیا ہے، دہشت گردی کو جنم دینے والوں کی حقیرانہ پابندیوں کو کوئی اہمیت نہیں دے گی۔

تحریک عصائب اہل الحق کے ترجمان جواد اطلیباوی نے ایک ٹوئٹ میں کہا کہ اگر امریکہ کی شرپسند حکومت سمجھتی ہے کہ وہ حشد الشعبی کے سربراہ فالح الفیاض اور نائب سربراہ ابو فدک المحمداوی پر پابندیاں عائد کر کے حشد الشعبی کو کمزور کر دے گی تو اسے جان لینا چاہئے کہ یہ اس کا خیال خام اور گمان باطل ہے۔