ڈونلڈ ٹرمپ کی مخالفت گھر سے ہونے لگی، بھتیجی نے بھی استعفیٰ کا مطالبہ کردیا

شیعیت نیوز : امریکی صدر ڈونلڈ ٹرمپ ملک کے ساتھ ساتھ گھر میں بھی مقبولیت کھوتے جارہے ہیں اور اب ان کی سگی بھتیجی میری ٹرمپ نے بھی اُن سے مستعفی ہونے کا مطالبہ کردیا ہے۔

تفصیلات کے مطابق امریکی صدر کی بھتیجی ان کے خلاف کتاب بھی لکھ چکی ہیں جس میں ان سے متعلق بہت سے اہم انکشافات کیے گئے ہیں۔

یہ خبر بھی پڑھیں نیتن یاہو کے گھر کے باہر ہزاروں اسرائیلیوں کا احتجاج ،استعفے کا مطالبہ زورپکڑگیا

میری ٹرمپ نے چچا ڈونلڈ ٹرمپ کو جھوٹا اور خود پسند شخص قرار دینے کے ساتھ امریکیوں کے لیے خطرہ بھی قرار دیا ہے۔ اب امریکی ٹی وی کو دیے گئے انٹرویو میں میری ٹرمپ نے کہا کہ ان کے چچا کا امریکا کا صدر رہنا خطرناک ہے۔

انہوں نے کہا کہ ٹرمپ سماج کے لیے ایک برا رویہ رکھنے والے شخص ہیں، اگر انہیں اپنے چچا سے کچھ کہنے کا موقع ملا تو وہ اس کے علاوہ کچھ نہیں کہیں گی کہ وہ مستعفی ہوجائیں۔

خیال رہے کہ میری ٹرمپ امریکی صدر کے بڑے بھائی آنجہانی فریڈ ٹرمپ جونیئر کی بیٹی ہیں اور امریکی صدر ان کے سگے چچا ہیں۔ کتاب کے پبلشرز نے میری ٹرمپ کی کتاب 14 جولائی کو شائع کرنے کا اعلان کیا تھا جسے روکنے کے لیے امریکی صدر کے چھوٹے بھائی اور مصنفہ کے دوسرے چچا رابرٹ ٹرمپ نے عدالت سے رجوع کیا تھا تاہم عدالت نے ان کا مؤقف مسترد کردیا تھا۔