نشان حیدر حاصل کرنے والے سوار محمد حسین کا 48 واں یوم شہادت آج منایا جا رہا ہے
سوار محمد حسین نے 3 دسمبر 1966 کو سترہ سال کی عمر میں پاک فوج میں شمولیت اختیار کی
شیعت نیوز :نشان حیدر پانے والے پاک فوج کے جوان سوار محمد حسین شہید 18 جون 1949ء کو ڈھوک پیر بخش تحصیل گوجر خان ضلع راولپنڈی میں پیدا ہوئے، انہوں نے 3 دسمبر 1966 کو سترہ سال کی عمر میں پاک فوج میں شمولیت اختیار کی۔
اطلاعات کے مطابق 1971 کی پاک بھارت جنگ میں سوار محمد حسین شہید کی تعیناتی شکر گڑھ سیکٹر میں ہوئی، ان کی ڈیوٹی سپاہیوں کو گولہ بارود پہچانے کی تھی۔ وہ خود بھی ٹینک شکن توپوں کے پاس جا کر دشمن کے ٹھکانوں کی نشاندہی کرتے جس سے بہت بڑی تعداد میں دشمن کے ٹینک تباہ ہوئے۔
یہ بھی پڑھیں :ستمبر1965 کی جنگ کا اصل ہیرو، چیف آف آرمی اسٹاف جنرل محمد موسیٰ ہزارہ
سوار محمد نے اپنی ذہانت اور حکمت عملی سے دشمن کو ناکوں چنے چبوا دیئے۔ جنگ میں بے مثال جرأت و بہادری کا مظاہرہ کرتے ہوئے دشمن کی آنکھوں میں آنکھیں ڈال کر جواں مردی سے اس کا مقابلہ کیا۔
یہ بھی پڑھیں :شمالی وزیرستان میں تکفیری دہشتگردوں کا حملہ، پاک فوج کے 3 جوان شہید
دوران جنگ 10 دسمبر 1971ء کو دشمن کی گولیوں کی بوچھاڑ نے ان کا سینہ چھلنی کر دیا، قوم کے اس بہادر سپوت نے اپنی جان دیکر دفاع وطن کا فریضہ انجام دیا اور 22 سال کی عمر میں مرتبہ شہادت پر فائز ہو گئے۔ شہید کی بہادری کے اعتراف میں انہیں پاک افواج کے اعلیٰ ترین فوجی اعزاز نشان حیدر سے نوازا گیا۔
