پی پی 168 کا ضمنی الیکشن، ایم ڈبلیوایم نے پی ٹی آئی کے امیدوار اسدکھوکھر کی حمایت کا اعلان کر دیا

شیعیت نیوز: مجلس وحدت مسلمین اور پاکستان تحریک انصاف کے رہمناؤں کے درمیان جامعہ مصطفیٰ لاہور میں ملاقات ہوئی۔ ملاقات میں حلقہ پی پی 168 کے ضمنی انتخابات کے حوالے سے تفصیلی گفتگو کی گئی۔ اس موقع پر مجلس وحدت مسلمین کے مرکزی سیکرٹری سیاسیات سید اسد عباس نقوی کا کہنا تھا کہ ایم ڈبلیو ایم کا پی ٹی آئی کے ساتھ اتحاد پاکستان کی نظریاتی سرحدوں کی حفاظت کی بنیاد پر ہے۔ پی ٹی آئی اور ایم ڈبلیو ایم قائد اعظم محمد علی جناح اور ڈاکٹر علامہ محمد اقبال کے پاکستان کو آگے بڑھانے کا مشترکہ وژن رکھتے ہیں۔ انہوں نے کہا کہ پی ٹی آئی سے ہمیں کچھ شکایتیں بھی ہیں کہ جس طرح پچھلی حکومتوں نے عزاداری پر قدغن لگائی، لیکن امید تھی کہ اس بار صورتحال بہتر رہے گی جو کہ نہ ہوسکی۔ انہوں نے امید ظاہر کی کہ پی ٹی آئی ہمارے ان معاملات کو سنجیدگی سے حل کرے گی۔

ایم ڈبلیو ایم کے صوبائی سیکرٹری جنرل سید مبارک علی موسوی کا اس موقع پر کہنا تھا کہ عزاداری ہماری شہہ رگ حیات ہے، ہم امید کرتے ہیں کہ پی ٹی آئی عزاداری کے حوالے سے بہترین پالیسی مرتب کرے گی، تاکہ عزاداروں کے مسائل کو حل کیا جا سکے۔ کارنر میٹنگ میں بات چیت کرتے ہوئے پی ٹی آئی کے سینیئر رہنما اعجاز چودھری کا کہنا تھا کہ میں پی ٹی آئی اور ایم ڈبلیو ایم کے کارکنوں کے درمیان فرق محسوس نہیں کرتا، میرا ایم ڈبلیو ایم کیساتھ تعلق حادثاتی نہیں بلکہ میں اس جماعت کی نیشنل اور انٹرنیشنل معاملات پر پالیسیوں کا معترف ہوں، جو کہ پاکستان کے بہترین مفاد میں ہیں، جبکہ ایم ڈبلیو ایم رہنماؤں نے حلقہ پی پی 168 کے امیدوار ملک اسد علی کھوکھر کی ضمنی انتخابات میں مکمل حمایت کی یقین دہانی کرائی۔