سید قاسم عباس شمسی امامیہ اسٹوڈنٹس آرگنائزیشن پاکستان کے 49ویں مرکزی صدر منتخب

شیعیت نیوز: امامیہ اسٹوڈنٹس آرگنائزیشن پاکستان کے سالانہ کنونشن میں قاسم شمسی کو نیا میرِ کارواں منتخب کر لیا گیا۔ آئی ایس او کے علی رضا آباد مرقدِ شہید ڈاکٹر محمد علی نقوی پر ہونیوالے امامیہ اسٹوڈنٹس آرگنائزیشن پاکستان کے سالانہ کنونشن رحمت للعالمین کی آخری نشست میں نئے میر کارواں کا انتخاب عمل میں آیا، ڈاکٹر عقیل موسٰی نے ان سے ذمہ داری کا حلف لیا۔ گذشتہ رات مجلس عاملہ اور مجلس نظارت کے اجلاس منعقد ہوئے اور آج دن کا آغاز ہوتے ہوئے پاکستان بھر کے یونٹ صدور کے سامنے سابق مرکزی جنرل سیکرٹری قاسم شمسی اور سابق صوبائی صدر اویس رضا کے نام پیش کئے گئے۔ الیکشن سے پہلے سابق مرکزی صدر انصر مہدی نے اپنے کابینہ سمیت مستعفی ہونے کا اعلان کیا اور رائے شماری کے نتیجے میں مرکزی صدر منتخب ہوئے۔

مرکزی صدر منتخب ہونے کا اعلان کیا گیا تو پنڈال میں موجود امامیہ نوجوانوں نے والہانہ انداز میں ان کا استقبال کیا اور قاسم بھائی قدم بڑھائو، ہم تمہارے ساتھ ہیں، کے نعرے لگائے۔ نو منتخب مرکزی صدر نے شرکاء کنونشن سے خطاب کرتے ہوئے کہا کہ وطن عزیز کی جغرافیائی اور فکری سرحدوں کا تحفظ ہمارا منشور ہے اور ہم وطن کی جانب اٹھنے والی ہر میلی آنکھ پھوڑنے کا جذبہ رکھتے ہیں۔ آئی ایس او ملک کی نظریاتی و جغرافیائی سرحدوں کی محافظ ہے اور اپنے وطن کے دفاع کیلئے مصروف عمل ہے۔

 واضح رہے کہ امامیہ اسٹوڈنٹس آرگنائزیشن پاکستان کے نومنتخب مرکزی صدر سید قاسم عباس شمسی کا تعلق صوبہ پنجاب کے شہر کبیروالا سے ہے۔ قاسم شمسی نیشنل یونیورسٹی آف ماڈرن لینگویجز (نمل) میں ایم اے صحافت کے طالبعلم ہیں۔ نومنتخب مرکزی صدر قاسم عباس شمسی سبکدوش ہونیوالی آئی ایس او کی مرکزی کابینہ میں سیکرٹری جنرل کی ذمہ داریاں نبھا چکے ہیں۔ اس سے پہلے ان کی پاس مرکزی سیکرٹری نشرو اشاعت کی ذمہ داری بھی تھی، جبکہ وہ آئی ایس او پاکستان ملتان کے ڈویژنل صدر بھی رہ چکے ہیں۔ قاسم شمسی کا شمار تنظیم کے محنتی کارکنوں میں ہوتا ہے اور مستقبل میں میڈیا میں اہم رول ادا کرنے کے خواہاں ہیں، جبکہ نسل نوء کو بھی حالات حاضرہ سے باخبر رہنے کی تلقین کرتے دکھائی دیتے ہیں۔ تنظیمی ذمہ داریوں کے حوالے سے بھی احساس سے بھرپور شخصیت کے مالک ہیں۔ طلبہ تنظیموں کے درمیان ہم آہنگی کیلئے بھی ماضی میں اہم کردار ادا کرچکے ہیں۔