یمنی حوثیوں نے 19 تیل بردار جہاز یرغمال بنالئے، سعودی سفیر

صنعاء(مانیٹرنگ ڈیسک) سعودی سفیر محمد آل جابر نے تصدیق کی ہے کہ یمنی حوثیوں نے 19 تیل بردار جہازوں کو رمی المخطاف کے علاقے میں یرغمال بنا رکھا ہے۔غیرملکی خبررساں ادارے کےمطابق یمن میں حوثیوں نے اپنے زیرِقبضہ علاقے رمی المخطاف میں مختلف ممالک کے 19 تیل بردارجہازوں کو یرغمال بنالیا ہے۔ یمن میں تعینات سعودی سفیر محمد آل جابر نے سماجی رابطے کی ویب سائٹ ٹویٹر پر تصدیق کرتے ہوئے بتایا ہے کہ حوثیوں نے تیل بردار 19 جہازوں کو اپنے زیر قبضہ علاقے رمی المخطاف میں روک رکھا ہے اور وہ انھیں الحدیدہ کی بندر گاہ میں داخل ہونے سے روک رہے ہیں۔ ان کی اس حرکت پر یمن کے انسانی امدادی مرکز کو گہری تشویش لاحق ہے۔

واضح رہے کہ یمن کے مغرب میں بحیرہ احمر پر واقع الحدیدہ کی بندرگاہ پر حوثیوں کا قبضہ ہے جب کہ بیرون ملک سے یمن میں امداد لے کر آنے والے بحری جہاز اور تیل بردار ٹینکرز اسی بندرگاہ پر لنگر انداز ہوتے ہیں۔