امریکہ نے افغانستان میں 70 ارب ڈالر ضائع کردیئے

امریکی حکام کی جانب سے کانگریس کو پیش کردہ رپورٹ میں اس بات کا انکشاف ہوا ہے کہ امریکہ نےگذشتہ 16 برس میں افغانستان میں 70 ارب ڈالر ضائع کردیئے ہیں جبکہ امریکہ افغان سکیورٹی فورسز کو بھی دہشت گردی کے خلاف جنگ میں آمادہ نہیں کرسکا ہے۔افغانستان کی بحالی پر مامور امریکہ کے خصوصی انسپکٹر جنرل ( سیگار) نے اپنی پیش کردہ رپورٹ میں اس بات کا بھی انکشاف کیا کہ افغانستان کی بری فورسز اب فضائی مدد چاہتی ہیں اور ان کا ماننا ہے کہ طالبان دہشت گردوں کو شکست دینے کے لیے افغان ایئرفورس کے لیے یہ ضروری ہے۔ رپورٹ کے مطابق افغانستان کے اندرونی اور بیرونی خطرات سے نمٹنے اور ملک میں دہشت گردوں کی محفوظ پناہ گاہوں کو دوبارہ بنانے سے روکنے کے لیے افغان نیشنل ڈیفنس اینڈ سیکیورٹی فورسز ( اے این ڈی ایس ایف) کو مکمل باصلاحیت بنانا بھی امریکی قومی سلامتی کا مقصد تھا۔ جس میں امریکہ ناکام ہوگیا ہے۔ کانگریس کے سامنے پیش کردہ رپورٹ میں بتایا گیا کہ 2002 کے بعد سے اے این ڈی ایس ایف پر امریکی حکومت کے 70 ارب ڈالر کی سیکیورٹی امداد خرچ کرنے، ان کی تربیت، مشاورت اور معاونت کرنے کے باوجود افغان فورسز اپنی ہی قوم کی حفاظت کرنے کے قابل نہیں ہوسکیں۔ اور اس طرح امریکہ نے افغانستان میں 70 ارب ڈالر ضائع کردیئے ہیں۔