میزائلوں کا باپ تیار ہے، دشمن نے غلطی کی تو خطے میں اس کی توانائی تنصیبات نشانے پر ہوں گی، جنرل محمد رضا نقدی

شیعیت نیوز : سپاہ پاسداران انقلاب اسلامی کے کمانڈر انچیف کے سینئر مشیر بریگیڈیئر جنرل محمد رضا نقدی نے کہا ہے کہ ہم نے اپنے میزائلوں کے باپ کو تیار کر رکھا ہے، اگر دشمن نے کوئی غلط قدم اٹھایا تو اس کا حملہ ناکامی سے دوچار ہوگا اور اس کے لیے فرار کا کوئی راستہ نہیں بچے گا۔ انہوں نے یہ بات اتوار کے روز شمالی شہر ساری میں ’جان فدا برائے ایران‘ مہم کے ہزاروں شرکاء سے خطاب کرتے ہوئے کہی۔

یہ بھی پڑھیں : صرف ایک وحشی تہذیب ہی اپنے سب سے بھاری بم کو ’ماں‘ کا نام دے سکتی ہے، ترجمان سپاہ پاسداران

یہ بیان امریکی صدر کی جانب سے ایرانی توانائی تنصیبات اور جوہری مراکز کے خلاف ’تمام بموں کی ماں‘ کہلانے والے بم کے استعمال کی دھمکی کا براہ راست جواب تھا۔ جنرل نقدی نے خبردار کیا کہ کسی بھی غلط فہمی کی صورت میں خطے میں جارحین کے تمام بنیادی ڈھانچے اور توانائی کے سرمایہ کاری کے مراکز ایرانی آپریشنل رینج میں ہوں گے اور ان کی سلامتی براہ راست خطرے میں پڑ جائے گی۔

انہوں نے کہا کہ ایران کی طاقت اور کامیابیوں کا اصل سرچشمہ فوجی ساز و سامان نہیں بلکہ ایرانی عوام کی بھرپور موجودگی اور آمادگی ہے، اسی آمادگی اور مزاحمت نے زمینی دراندازی کو روکا اور دشمن کے جنگی جہازوں کو سمندر میں ایک ہزار کلومیٹر پیچھے ہٹنے پر مجبور کر دیا۔ جنرل نقدی نے کہا کہ امریکی صدر کا صبر ختم ہونے اور سخت کارروائی کی دھمکیوں پر مبنی حالیہ بیانات ایرانی قوم کے سامنے شکست کا کھلا اعتراف ہیں، کیونکہ جیتنے کا دعویٰ کرنے والا فریق صبر ختم ہونے کی بات نہیں کرتا۔

سپاہ پاسداران کے سینئر مشیر نے کہا کہ 12 روزہ جنگ کے دوران ایران پر 14 ٹن وزنی بم گرائے گئے، جن میں سے بعض پھٹ نہ سکے اور ایرانی افواج کے قبضے میں آ گئے، اس لیے اب ان ہتھیاروں کے نمونے بنانے والے ملک کے علاوہ ایران کے پاس بھی موجود ہیں۔

ادھر سپاہ پاسداران انقلاب اسلامی کے ترجمان حسین محبی نے خبردار کیا ہے کہ ایران کی توانائی تنصیبات پر کسی بھی قسم کی جارحیت سے ہونے والا نقصان ہمارے دانشمند نوجوان فوری طور پر ٹھیک کر دیں گے، لیکن یہ جارحیت مقبوضہ علاقوں کو ہمیشہ کے لیے جلی ہوئی زمین میں تبدیل کر دے گی اور ان کے غاصبوں کو صحرائے سینا میں دربدر کر دے گی۔ انہوں نے کہا کہ دنیا دیکھے گی کہ کیا ہوتا ہے۔