فقہ جعفریہ کے مطابق 10 منٹ سحری کے فرق کی بات درست نہیں، وفاق المدارس شیعہ

شیعیت نیوز: وفاق المدارس الشیعہ پاکستان کے ترجمان نے واضح کیا ہے کہ فقہ جعفریہ کے مطابق 10 منٹ سحری کے فرق کی بات درست نہیں، احتیاط کے طور پر صرف 3 ،4 منٹ پہلے سحری کرلی جائے، 10 منٹ کا اہلسنت سے فرق صرف افطاری کے وقت ہوتا ہے۔ میڈیا سیل کی طرف سے جاری بیان میں ترجمان نے کہا کہ کچھ عرصے سے نوٹ کیا گیا ہے کہ مختلف میڈیا ہاوسز کی طرف سے مختلف اوقات سحر وافطار شائع اور نشر کئے جا رہے ہیں، جو کہ درست نہیں۔ اس حوالے جامعتہ المنتظر لاہور نے شرعی اور موسمیاتی ماہرین کی مدد سے لاہور اور مضافات کیلئے کیلنڈر تیار کیا ہے جسے ملک کے باقی علاقوں میں جغرافیائی فرق کے اعتبار سے استعمال کیا جا سکتا ہے۔ انہوں نے اخبارات کے ایڈیٹرز اور الیکٹرانک میڈیا کے ذمہ داران کی توجہ مبذول کرواتے ہوئے اپیل کی ہے کہ درست اوقات سحر و افطار کو شائع اور نشر کیا جائے تاکہ عوام تک معلومات صحیح انداز سے پہنچ سکیں۔ ترجمان کا کہنا تھا کہ سحری کے اوقات میں فقہ جعفریہ اور فقہ حنفیہ میں فرق نہیں، اہل تشیع صرف احتیاط کے طور پر 3 سے 4 منٹ پہلے کھانا پینا بند کرتے ہیں، جسے غلط طور پر سمجھا اور اس پر عمل کیا جا رہا ہے۔ اس طرح سے روزہ دار کی حق تلفی بھی ہوتی ہے اور اگر اسی حساب سے وہ نماز ادا کرے گا تو نماز فجر نہیں ہوگی کیونکہ وہ قبل از وقت ادا کر رہا ہوگا۔ افطاری کے وقت غروب شرعی، غروب آفتاب کے تقریباً 10 منٹ بعد ہوتا ہے جس کا فرق اہلسنت برادران سے اہل تشیع کرتے ہیں لیکن اسے فارمولے کے طور پر استعمال کرنا درست نہیں۔