عشرہ محرم کی آمد، کربلائے معلی میں خصوصی سیکورٹی پلان
عراق کے صوبہ کربلا کے پولیس سربراہ نے کہا ہے کہ عشرہ محرم کے دوران امن و امان کے تحفظ کی غرض سے خصوصی سیکورٹی پلان تیار کیا گیا ہے۔
کربلائے معلی سے ہمارے نمائندے نے خبر دی ہے کہ کربلا کی پولیس کے سربراہ اپنے ایک بیان میں کہا ہے کہ اس سیکورٹی پلان میں پولیس، فوج اور عوامی رضاکار فورس کے جوان ہر قسم کے ممکنہ ناخوشگوار واقعے سے نمٹنے کے لئے تیار ہیں- اس درمیان نواسۂ رسولۖ حضرت امام حسین علیہ السلام کے حرم مطہر کی انتظامی کمیٹی نے اعلان کیا ہے کہ حرم مطہر کے گنبد کا سرخ پرچم، اتوار کی رات نماز مغرب و عشاء کے بعد تبدیل کر دیا جائے گا اور سرخ پرچم کی جگہ سیاہ پرچم گنبد پر نصب کر دیا جائے گا- اس درمیان عراق کی شہری ترقی اور بلدیاتی امور کی وزیرمحترمہ آن نافع نے کربلائے معلی کے اپنے دورے میں اپنی وزارت سے متعلقہ اداروں کو حکم دیا ہے کہ وہ محرم اور حضرت امام حسین علیہ السلام کے چہلم میں آنے والے زائرین کی خدمت کے لئے اپنے تمام وسائل بروئے کار لائیں- دوسری جانب بغداد کے جنوب میں واقع شہر مدائن میں ایک دہشت گردانہ بم دھماکے میں ایک عام شہری جاں بحق اور چھے دیگر زخمی ہو گئے- ادھر موصل میں دہشت گرد گروہ داعش نے تیرہ افراد کو زندہ درگور کر دیا- دریں اثنا عراق کے مشرقی صوبے دیالہ کی صوبائی کونسل کے رکن احمد الربیعی نے بھی بتایا ہے کہ دہشت گرد گروہ داعش نے جمعے کو بعقوبہ کے شمال مشرق میں تین عراقی پناہ گزیں خاندانوں کے گھروں کو دھماکے سے اڑا دیا۔
