غزہ کی فتح صیہونی ریاست کی تاریخ کا اسٹریٹجک موڑ ہے، علامہ شفقت شیرازی

شیعیت نیوز: جامعۃُ الولایہ، قم المقدسہ کے زیرِ اہتمام عالمی یومِ طوفانِ الاقصٰی کے موقع پر منعقدہ سیمینار سے مجلسِ وحدتِ مسلمین پاکستان کے سربراہِ امورِ خارجہ علامہ سید شفقت حسین شیرازی نے خطاب کرتے ہوئے قضیہِ فلسطین کی اہمیت اور ضرورت پر روشنی ڈالی اور کہا کہ غزہ کی فتح غاصب صیہونی ریاست کے وجود کی تاریخ میں ایک اسٹریٹجک واقعہ ہے، جسے کئی دہائیوں تک یاد رکھا جائے گا۔

یہ بھی پڑھیں : پاکستان کی ایران کے ساتھ تجارت میں تیزی

انہوں نے کہا کہ غاصب صیہونی جیلوں سے بے گناہ فلسطینی اسیروں کی رہائی مظلوم فلسطینیوں کی ایک بڑی قومی کامیابی ہے اور غزہ کی پٹی میں سلامتی و استحکام کو برقرار رکھنا بہادر فلسطینی مزاحمت کی قومی ذمہ داری ہے۔

علامہ شفقت شیرازی نے مؤقف اپنایا کہ جس طرح غزہ فتح ہوا، اسی طرح فلسطین آزادی کے راستے پر مزاحمت کے ذریعے فتح حاصل کرے گا اور مقبوضہ سرزمین کو واپس لے کر ایک آزاد فلسطینی ریاست قائم کی جائے گی—جس کا ابدی دارالحکومت، ان شاء اللہ، قدسِ شریف ہوگا۔