شہید امجد صابری کی نمازہ جنازہ میں مجلس وحدت مسلمین کی شرکت ،قتل کی شدید مذمت

شیعیت نیوز: مجلس وحدت مسلمین کے رہنماؤں نے صوبائی سیکرٹری جنرل علامہ مقصود علی ڈومکی کی قیادت میں شہید امجد صابری کے جنازہ میں شرکت کی اور لواحقین سے اظہار تعزیت کیا۔ اس موقع پر علامہ باقر عباس زیدی، علامہ علی انور جعفری، علامہ صادق جعفری موجود تھے۔ رہنماؤں نے شہید امجد صابری کے جنازہ کے بعد میڈیا سے گفتگو میں کہنا تھا کہ وفاقی و سندھ حکومت نے کراچی آپریشن کے نام پر اربوں روپے جھونک دیئے مگر نتائج حاصل کرنے میں بری طرح ناکام رہی، ملک بھر میں دہشت گردی کے خلاف بنائے جانے والا نیشنل ایکشن پلان بھی ناکام نظر آتا ہے، دوسری جانب جس آپریشن کا کپتان اپنی ٹیم منتخب کرنے کا اختیار نہ رکھتا ہو وہ آپریشن کو کس طرح منطقی انجام تک پہنچا سکتا ہے، شہر قائد کو اجرتی قاتلوں اور شدت پسند مذہبی تنظیم کے غنڈوں نے یر غمال بنا رکھا ہے، جب تک اداروں اور حکومت میں موجود ذمہ داران اپنی آنکھوں سے تعصب کی عینک نہیں اتاریں گے، اس وقت تک کراچی آپریشن سے مثبت نتائج حاصل نہیں کئے جاسکتے۔

اس موقع پر علامہ مقصود ڈومکی نے کہا کہ کراچی میں کالعدم مذہبی تنظیم کے دہشت گرد کھلے عام دندناتے پھرتے ہیں جب کہ قانون کا اطلاق صرف امن پسند مظلوم عوام پر ہورہا ہے، کراچی میں چیف جسٹس کے بیٹے کو دن دھاڑے اغوا کرلیا جاتا ہے مگر تین دن گزر جانے کے باوجود کوئی سراغ نہیں ملتا اگر یہ نا اہلی نہیں تو اور کیا ہے۔ رہنماؤں نے امجد صابری کی شہادت پر ان کے اہل خانہ سے تعزیت کا اظہار کیا اور کہا کہ امجد صابری پاکستان کا ایک اثاثہ تھے یہ محب وطن عاشق رسول (ص) و اہلبیت علیہ السلام تھے اور امجد صابری وحدت مسلمین کے داعی تھے جن کی کمی ہمیشہ محسوس ہوگی۔ رہنماؤں نے سندھ حکومت سے مطالبہ کیا کہ امجد صابری کے قتل میں ملوث سفاک دہشت گردوں کو فی الفور گرفتار کیا جائے اور کالعدم ملک دشمن مذہبی شدت پسند تنظیموں کے خلاف بھرپور کاروائی کرکے انہیں کیفر کردار تک پہنچایا جائے۔