ہم اپنے اصول سے ہرگز پیچھے نہیں ہٹیں گے۔تحریک انصار اللہ کے رہنما

یمن کی عوامی انقلابی تحریک انصار اللہ کے رہنما ضیف اللہ الشّامی نے کہا ہے کہ ہم اپنے اصول سے ہرگز پیچھے نہیں ہٹیں گے۔

یمن کی عوامی تحریک انصار اللہ کے سیاسی شعبے کے رکن ضیف اللہ الشامی نے ارنا سے گفتگو کرتے ہوئے کہا کہ ہم اور ہمارے سیاسی رہنما جنیوا مذاکرات کو پیچیدگی سے بچانے کی کوشش کر رہے ہیں۔ ضیف اللہ شامی نے کہا کہ جنیوا مذاکرات کے مستقبل اور اس کے نتائج کے بارے میں کچھ بھی کہنا قبل از وقت ہوگا- انھوں نے کہا کہ انصار اللہ، آنے والی تبدیلیوں اور جنگ میں پیشرفت جاری رکھنے کے باوجود مذاکرات میں اپنے موقف کا اعلان کرے گی- انھوں نے کہا کہ جنیوا مذاکرات میں یمن کے سیاسی گروہوں کی شرکت، بغیر کسی شرط کے انجام پا رہی ہے اور ہر فریق مذاکرات میں بغیر کسی شرط کے اپنی تجاویز پیش کرے گا۔ ضیف اللہ الشامی نے تاکید کے ساتھ کہا کہ یمن کے عوام کے خلاف آل سعود کی جارحیت کا سلسلہ جاری رہنا اس کی ذلت آمیز شکست کا ثبوت ہے جس سے اس بات کا بھی پتہ چلتا ہے کہ وہ اپنے مقاصد حاصل کرنے میں ناکام رہی ہے- الشامی نے مزید کہا کہ آل سعود اپنی بربریت سے یمنی عوام میں خوف و ہراس پیدا کر رہی ہے- تحریک انصار اللہ کے رکن نے سعودی زیر محاصرہ، یمنی عوام کے لئے انسان دوستانہ امداد کے حوالے سے کہا کہ عالمی برادری نے یمن کے عوام کے حق میں بہت زیادہ کوتاہی کی ہے- انھوں نے کہا کہ جارحین پر دباؤ بڑھایا جانا بہت زیادہ ضروری ہے تاکہ یمن کے مظلوم عوام کے لئے انسان دوستانہ امداد پہنچنے کا کوئی طریقہ تلاش کیا جا سکے۔