عراق، فوج اور عوامی فورس کی کاروائی،90 دہشت گرد ہلاک
عراق کے الانبار اور صلاح الدین صوبوں میں فوج اور عوامی رضاکار فورس کی کارروائیاں بدستور جاری ہیں۔
عراقی ذرائع کے مطابق فوج اور عوامی رضاکار فورس کے جوانوں نے الرمادی کے علاقے ناظم الثرثار کو دہشت گرد گروہ داعش سے پاک کردیا ہے۔ عراق کی البدر تنظیم کے سربراہ ہادی العامری نے بتایا ہے کہ فوج اور عوامی فورس نے مشترکہ کارروائی کرکے داعش کے محاصرے میں پھنسے عراقی فوجیوں کو بھی آزاد کرالیا ہے۔ عراق کی وزارت دفاع نے بتایا ہے کہ مشرقی صوبے الانبار میں موجود داعش کے ٹھکانوں کو بھی نشانہ بنایا گیا ہے۔ الانبار کے ایک اور علاقے الملاحمہ میں بھی عراقی فضائیہ کی کارروائی میں پچیس تکفیری دہشت گردوں کے ہلاک ہونے کی خبریں بھی موصول ہوئی ہیں۔ سامرا میں فوج اور عوامی رضاکار فورس کے مشترکہ دستوں نے دہشتگردوں کے پانچ ٹھکانوں کو تباہ کردیا۔ اس کارروائی میں داعش کے پینسٹھ دہشت گرد ہلاک ہوگئے۔ دوسری جانب عراقی پارلیمنٹ کے سینیئر رکن ماجد الغراوی نے کہا ہے کہ الانبار اور صلاح الدین صوبوں سے دہشت گردوں کے خلاف آپریشن میں عوامی رضاکار فورس فیصلہ کن کردار ادا کر رہی ہے
