بغداد اور کرکوک میں بم دھماکے،32 افراد جاں بحق۔
شیعیت نیوز{مانیٹرنگ ڈیسک}عراق کے شمالی شہر کرکوک اور دارالحکومت بغداد میں کار بم دھماکوں کے نتیجے میں33افراد ہلاک اور70سے زیادہ زخمی ہوگئے ہیں۔
العالم ٹی وی کے مطابق کرکوک کے کرد آبادی والے علاقے شرجاح میں ایک مصروف شاہراہ پر کار بم دھماکا ہوا ہے۔اس شاہراہ پر متعدد ریستوران اور دکانیں واقع ہیں۔عراقی پولیس کے ایک کرنل کا کہنا ہے کہ بم دھماکے کے نتیجے میں بڑے پیمانے پر تباہی ہوئی ہے۔صوبہ کرکوک کی نظامت صحت کے سربراہ صباح محمد امین نے بم دھماکے میں پندرہ افراد کی ہلاکتوں کی تصدیق کی ہے اور بتایا ہے کہ اسپتال میں بیس زخمیوں کو منتقل کیا گیا ہے۔ قبل ازیں جمعرات کی شام دارالحکومت بغداد کے گنجان آباد مشرقی علاقے صدر سٹی میں بیس منٹ کے وقفے سے 2کار بم دھماکے ہوئے ہیں۔ان میں15افراد ہلاک اور اکاون زخمی ہوگئے ہیں۔ ان حملوں سے پہلے بغداد کے انتہائی سکیورٹی والے علاقے گرین زون میں ایک بم دھماکے میں دو افراد مارے گئے۔اس علاقے میں عراقی پارلیمان اور حکومت کے دفاتر ہیں اور امریکا سمیت بعض ممالک کے سفارت خانے قائم ہیں۔بم دھماکے کے بعد عراقی سکیورٹی فورسز نے دریائے دجلہ پر مشرقی اور مغربی بغداد کو ملانے والے دو پُلوں کو بند کردیا ہے۔
فوری طور پر کسی گروپ نے ان بم حملوں کی ذمے داری قبول نہیں کی ہے۔تاہم عراق کے شمال اور شمال مغرب میں واقع قریباً 5صوبوں پر اس وقت قابض دہشت گردگروپ داعش پر ماضی میں اس طرح کے کار بم دھماکوں میں ملوث ہونے کے الزامات عاید کیے جاتے رہے ہیں اور اس گروپ نے خود بھی بغداد کے شیعہ آبادی والے علاقوں میں متعدد مرتبہ بم حملوں یا کار بم دھماکوں کی ذمے داری قبول کی ہے۔
