انقلاب مارچ اور یوم شہداء حکمرانوں کے تابوت میں آخری کیل

مجلس وحدت مسلمین پاکستان کے سربراہ علامہ ناصر عباس جعفری نے کہا ہے کہ انقلاب مارچ اور یوم شہداء میں شامل ہونے والوں کیخلاف کوئی بھی پرتشدد اقدام حکمرانوں کے تابوت میں آخری کیل ثابت ہوگی۔ صوبائی سیکرٹریٹ پنجاب میں صحافیوں کے ساتھ ملاقات کے دوران پاکستان کی موجودہ صورت حال پر گفتگو کرتے ہوئے علامہ ناصر عباس جعفری کا کہنا تھا کہ پاکستانی عوام ان جعلی مینڈیٹ اور انجنیئرڈ الیکشن کے ذریعے اقتدار پر قابض حکمرانوں کےخلاف میدان عمل میں نکل چکے ہیں، اب ان غاصبوں کا جانا ٹھہر گیا ہے۔ انہوں نے کہا کہ انقلاب مارچ اور یوم شہداء میں شامل ہونے والوں کیخلاف کوئی بھی پرتشدد اقدام حکمرانوں کے تابوت میں آخری کیل ثابت ہوگي۔ علامہ ناصر عباس جعفری نے کہا کہ علامہ ڈاکٹر طاہرالقادری کیخلاف مقدمے کے اندراج سے ثابت ہوگیا کہ حکمراں حواس باختہ ہوچکے ہیں، ہم اس اقدام کی شدید مذمت کرتے ہیں، شریف برادران نے مقدمہ درج کرکے اپنی آمرانہ سوچ کا ایک بار پھر قوم کے سامنے اظہار کر دیا۔

انہوں نے واضح کیا کہ مجلس وحدت مسلمین نظام کی تبدیلی کے لئے ڈاکٹر طاہرالقادری، مسلم لیگ قاف اور سنی اتحاد کونسل کے ہم قدم ہے، حکمران جتنا ظلم چاہے کر لیں اُنہیں جلد عوام کی عدالت میں جوابدہ ہونا پڑیگا، نظام کی تبدیلی کے بعد بھی ہم مل کر ملک و قوم کو دہشت گردی، مہنگائی اور بے روزگاری کے عفریت سے نجات دلائیں گے۔ انہوں نے کہا کہ عوام نے شریفوں اور زرداریوں کی حکمرانی دیکھ لی 14 اگست کو پاکستانی قوم اپنے حکمرانوں کے انتخاب کا فیصلہ خود کرے گی۔