آل پاکستان شیعہ ایکشن کمیٹی کے تحت علامہ عارف حسین الحسینی کی برسی پر تعزیتی اجتماع

آل پاکستان شیعہ ایکشن کمیٹی کے تحت قائد شہید علامہ عارف حسین الحسینی کی برسی کی مناسبت سے منعقدہ تعزیتی اجتماع سے خطاب کے دوران علامہ مرزا یوسف حسین نے کہا کہ علامہ عارف حسین الحسینی اتحاد امت کے داعی تھے آپ نے امت مسلمہ کو یکجہتی رواداری کے پیغام کے ساتھ ساتھ مسلمانوں کو سامراجی قوتوں کی آنکھوں میں آنکھیں ڈال کر بات کرنے کا حوصلہ عطاء کیا ، آج مسلمان آپ کی سیرت و کردار اور جرأت و بہادری کی پیروی کریں تو سامراج کی غلامی سے نجات حاصل کر سکتے ہیں ۔ اس موقع پر علامہ اظہر حسین نقوی ،صغیر عابد رضوی، سہیل مرزا، رضی حیدر اور دیگر نے بھی خطاب کیا اور کہا کہ علامہ عارف حسین الحسینی جیسی شخصیت صدیوں میں پیدا ہوتی ہے ہمیں چاہیئے کہ ان کی تعلیمات اور فکر و فلسفے کو عام کریں تاکہ دنیا اس سے فیضیاب ہو اور مسلم امہ بھی دوسری اقوام کی طرح سر اٹھا کر جی سکے۔بعد ازاں شہید کی بلندی درجات اور مغفرت کیلئے خصوصی دعا کی گئی ۔اجتماع سے خطاب کرتے ہوئے مقررین نے علامہ عارف حسین الحسینی کی اتحاد بین المسلمین کیلئے خدمات پر روشنی ڈالی اور ان کے فکر و فلسفہ کو عام کرنے کی ضرورت پر زور دیا۔