عوامی ایکشن کمیٹی کے رہنماوں کا شاندار استقبال

گندم سبسڈی اور دیگر مطالبات کے حل کے بعد عوامی ایکشن کمیٹی نے امن کا بیڑا اٹھا لیا۔ عوامی ایکشن کمیٹی بلتستان ڈویژن اور اسلام آباد سے کامیاب مذاکرات کرنے والے راہنماوں کا نمائندہ وفد امن کو فروغ دینے اور جذبہ خیر سگالی کیلئے چلاس پہنچ گیا۔ عوامی ایکشن کمیٹی دیامر سمیت دیگر سیاسی پارٹیوں سے تعلق رکھنے والی شخصیات کا والہانہ استقبال، شیعہ، سنی، اسماعیلی، نور بخشی بھائی بھائی کے فلک شگاف نعرے، پھولوں کے ہار ڈالے گئے اور گینی سے ریلی کی شکل میں چلاس لایا گیا۔ مقامی ہوٹل میں منعقدہ تقریب سے خطاب کرتے ہوئے عوامی ایکشن کمیٹی کی مذاکراتی ٹیم کے رکن و ممبر قانون ساز اسمبلی مرزا حسین نے کہا کہ گلگت بلتستان کی عوام طویل عرصے کے بعد اپنے حقوق کیلئے متحد ہوئے ہیں، عوامی ایکشن کمیٹی نے عوام کو متحد کرنے میں بنیادی کردار ادا کیا۔

وزیراعظم پاکستان نواز شریف اور وزیر امور کشمیر گلگت بلتستان برجیس طاہر نے گلگت بلتستان کے عوام کے مطالبات حل کئے جس پر ہم ان کے مشکور ہیں۔ انہوں نے کہا کہ صوبائی حکومت نے تین مہینے تک عوام کو سڑکوں پر رکھا، اگر صوبائی حکومت چاہتی تو گندم ایشو کا مسئلہ خود بھی حل کرسکتی تھی لیکن ایسا نہیں کیا، جس کی وجہ سے عوام مجبوراً سراپا احتجاج بنے۔ انہوں نے کہا کہ گلگت بلتستان میں امن وقت کی ضرورت ہے جس کیلئے ہم سب نے کردار ادا کرنا ہے۔ اس خطے کے عوام کو ہمیشہ ایک سازش کے تحت لڑایا گیا۔ اب گلگت بلتستان کے عوام نے تہیہ کر لیا ہے کہ وہ سازشوں کا شکار ہوئے بغیر امن کیلئے ہر قسم کی قربانی دینگے۔

اس موقع پر خطاب کرتے ہوئے جماعت اسلامی گلگت بلتستان کے امیر و عوامی ایکشن کمیٹی گلگت بلتستان کے رہنماء عبدالسمیع نے کہا کہ اب لڑاؤ اور حکومت کرو کی پالیسی نہیں چل سکتی۔ گلگت بلتستان کے عوام عوامی ایکشن کمیٹی کی قیادت میں ایک لڑی میں پرو چکے ہیں۔ آج کا دن گلگت بلتستان کے عوام کو مبارکباد کا دن ہے۔ جو اپنے تمام اختلافات بھلا کر ایک پلیٹ فارم پر متحد ہو چکے ہیں۔ انہوں نے کہا کہ عوامی ایکشن کمیٹی میں کوئی اینٹی پاکستانی نہیں پوری قوم پاک فوج کے ساتھ ہے۔ اس موقع پر خطاب کرتے ہوئے مولانا شیخ ناصر زمانی نے کہا کہ گلگت بلتستان کی عوام کو خراج تحسین پیش کرتا ہوں جو ہر قسم کے اختلافات بھلا کر ایک پلیٹ فارم پر اپنے حقوق کے حصول کے لئے یک زبان ہوئے۔ انہوں نے کہا کہ مستقبل میں بھی بعض عناصر قوم میں دراڑ ڈالنے کی کوشش کرینگے۔ عوام، علماء اور عمائدین ملکر اس سازش کو ناکام بنائیں۔ اس موقع پر جامع مسجد چلاس کے خطیب مولانا مزمل شاہ نے خطاب کرتے ہوئے کہا کہ عوامی ایکشن کمیٹی کی جدوجہد کو خراج تحسین پیش کرتا ہوں کہ انہوں نے اتحاد و اتفاق ایجاد کرکے عوام کو ان کا حق دلایا۔