مختلف مذہبی تنظیموں کی جانب سے شام ميں صحابہ کرام کے مزارات کی بے حرمتی کے خلاف احتجاجی مظاہرہ

قبائلی علاقے پاراچنار میں بھی مختلف مذہبی تنظیموں نے شام ميں صحابہ کرام کے مزارات کو منہدم کرانے کی شدید مذمت کی ہے اور حکومت پاکستان سے شام کے معاملات ميں مداخلت بند کرانے کا مطالبہ کیا ہے ۔ پاراچنار کے تمام تنظیموں کے زیر نگرانی شام میں صحابہ کرام کے مزارات کو منہدم کرانے اور حکومت پاکستان سے شام کے معاملات میں مداخلت کے خلاف احتجاجی جلوس نکالا گیا۔ جلوس پاراچنار پریس کلب پہنچ کر دھرنے کی شکل اختیار کی۔ احتجاجی جلسے میں آئی ایس او پاراچنار، آئی او پاراچنار، تحریک حسینی، انصارالحسین پاکستان پاراچنار اور مجلس علمائے اہلبیت پاراچنار سمیت دیگر ہزاروں افراد نے شرکت کی۔ احتجاجی جلسے میں پاراچنار ميں تمام مذہبی تنظیموں نے شام ميں صحابہ کرام کے مزارات کو نقصان پہنچانے کی شدید مذمت کی ہے اور اسے عالم اسلام کے خلاف گہری سازش قرار دیا ہے

اس موقع پر مظاہرین سے خطاب کرتے ہوئے علامہ منیر حسین ، سید امین حسین، مرتضی حسین اور دیگر مقررین نے کہا کہ شام ميں صحابہ کرام کے زیارات اور مقدس مقامات کو نقصان پہنچانا غیر مسلم قوتوں کی گہری سازش ہے اور مسلم حکمران ان سازشوں کو بے نقاب کرانے ميں اپنا کردار ادا کریں ۔ مقررین نے اعلان کیا کہ اگر پاکستانی حکمرانوں نے شام کے حوالے سے اپنی پالیسی واضح نہ کی تو وہ اپنا احتجاج جاری رکھیں گے۔