جارحیت بڑھی تو سعودی عسکری و اسٹریٹجک اہداف پر برابر کا جواب دیا جائے گا، انصاراللہ کے سیاسی بیورو کے رکن

شیعیت نیوز : یمن کی مزاحمتی تحریک انصاراللہ کے سیاسی بیورو کے رکن حزام الاسد نے کہا ہے کہ یمنی شہریوں اور شہری تنصیبات پر حملے اس بات کا ثبوت ہیں کہ سعودی رجیم برسوں کی جنگ اور وسیع امریکی و صیہونی حمایت کے باوجود اپنے فوجی اہداف حاصل کرنے میں ناکام رہی ہے، اور خبردار کیا کہ جارحیت میں مزید اضافے کا جواب عسکری اور اسٹریٹجک اہداف کے خلاف برابر کی کارروائی سے دیا جائے گا۔

یہ بھی پڑھیں : صنعاء نے مذاکرات مسترد نہیں کیے، سعودی عرب روڈ میپ کے وعدوں سے فرار اختیار کر رہا ہے، یمنی قومی وفد کے سربراہ

انہوں نے صعدہ، مقبنہ اور ذمار سمیت یمن کے مختلف علاقوں میں گھروں، بازاروں، پلوں، اسکولوں، اسپتالوں، مساجد اور شہری اجتماعات پر سعودی حملوں کا حوالہ دیا، جن میں صعدہ کے ضلع سحار میں دوپہر کے کھانے کے لیے جمع ایک خاندان کو نشانہ بنانے کا واقعہ بھی شامل ہے۔ حزام الاسد نے کہا کہ یہ حملے یمن کو اپنے مطالبات اور فلسطین کی حمایت سے دستبردار ہونے پر مجبور نہیں کر سکتے۔

انہوں نے کہا کہ یمنی افواج کے پاس سعودی سرزمین کے اندر فوجی تنصیبات، ہوائی اڈوں، تیل تنصیبات اور اہم بنیادی ڈھانچے سمیت اہداف کی وسیع فہرست موجود ہے، اور جیزان سے رابغ اور مشرقی صوبے تک تیل سے متعلق مقامات پر حملوں کا ذکر کیا۔ ساتھ ہی انہوں نے واضح کیا کہ سعودی شہری اور وہاں مقیم افراد یمنی کارروائیوں کا ہدف نہیں ہیں۔ انہوں نے یمنی شہریوں کے قتل عام پر عالمی برادری کی خاموشی کو تنقید کا نشانہ بناتے ہوئے کہا کہ مالی اور تیل کے مفادات نے بعض عالمی طاقتوں کے مؤقف پر اثر ڈالا ہے، اور یاد دلایا کہ مالی دباؤ کے ذریعے ہی سعودی عرب کا نام اقوام متحدہ کی بلیک لسٹ سے نکلوایا گیا تھا۔

ادھر یمنی محکمۂ اخلاقی رہنمائی کے انفارمیشن سینٹر کے ڈائریکٹر کرنل زکریا الشرابی نے کہا کہ یمنی فضائی دفاعی صلاحیت میں ترقی نے سعودی فضائی کارروائیوں کو شدید مشکلات سے دوچار کر دیا ہے اور سعودی طیارے اب یمنی فضاؤں میں جنگ کے ابتدائی برسوں جیسی آزادی سے پرواز نہیں کر سکتے۔ انہوں نے ایف 15 اور یوروفائٹر ٹائیفون لڑاکا طیاروں کے علاوہ ترک ساختہ آقنجی، امریکی ایم کیو 9 اور چینی ونگ لونگ ڈرونز کو نشانہ بنائے جانے کے واقعات کا حوالہ دیا۔

یمنی رہنماؤں کے یہ بیانات اس حقیقت کی عکاسی کرتے ہیں کہ ناکہ بندی کے بدلے ناکہ بندی اور جارحیت کے بدلے جارحیت کی نئی مساوات نے آل سعود کے تمام اندازے الٹ دیے ہیں، اور سعودی جارحیت کی ہر نئی لہر کے ساتھ یمن کی دفاعی و جوابی طاقت میں اضافہ ہو رہا ہے۔