طالبان کے اہلِ خانہ فوج کی تحویل میں نہیں ہیں‘
پاکستان کی فوج نے کالعدم تنظیم تحریک طالبان پاکستان کے اس دعوے کو مسترد کردیا ہے جس میں کہا گیا ہے کہ شدت پسندوں کی خواتین اور بچے سکیورٹی فورسز کی تحویل میں ہیں۔
فوج کے شعبۂ تعلقاتِ عامہ آئی ایس پی آر کی جانب سے سنیچر کو جاری ہونے والے ایک مختصر بیان میں کہا گیا ہے کہ اس بات میں کوئی حقیقت نہیں کہ طالبان کے اہلِ خانہ اور بچے فوج کی تحویل میں ہیں۔
بیان میں وضاحت کی گئی کہ طالبان کی کوئی خاتون یا بچہ سکیورٹی فورسز کے قبضے میں نہیں ہے اور نہ ہی کبھی ان کو تحویل میں لیا گیا۔
بیان کے مطابق طالبان کے اس بے بنیاد الزام کا مقصد پروپیگنڈہ پھیلانا ہے تاکہ ان کی ظالمانہ کاروائیوں سے توجہ ہٹائی جا سکے۔
پاکستانی فوج کے اس وضاحتی بیان کے حوالے سے تحریک طالبان پاکستان کی جانب سے تاحال کوئی ردعمل سامنے نہیں آیا ہے۔
خیال رہے کہ حکومت اور طالبان کے درمیان حالیہ مذاکرات کے دوران طالبان کی طرف سے یہ مطالبہ بھی سامنے آیا تھا کہ سکیورٹی فورسز کی تحویل میں قید ان کے اہل خانہ اور بچوں کو رہا کیا جائے