عراق، 157 دہشت گرد ہلاک، فوج وسیع آپریشن کے لئے تیار

عراق کی مسلح فوج کے ترجمان جنرل قاسم عطا نے بتایا ہے کہ گزشتہ چوبیس گھنٹے کے دوران مختلف کارروائیوں میں 157 ہشت گرد مارے گئے ہیں۔انہوں نے جمعرات کو بغداد میں پریس كانفرنس میں کہا کہ صلاح الدین صوبے میں فوج اور قبائلي لوگوں نے فضائیہ کی مدد سے47 دہشت گردوں کو ہلاک کر دیا ۔ ان کا کہنا تھا کہ اس کارروائی میں داعش کی 14 گاڑیوں کو تباہ کر دیا گیا۔ فوج کے ترجمان کا کہنا ہے کہ تكريت شہر کے مرکزی دروازے اور نکلنے کے راستے پر فوج کا مکمل کنٹرول ہے اور فوج شہر کے اندر مسلسل حملے کر رہی ہے۔
فوج کے ترجمان کا کہنا ہے کہ اسی طرح دیالہ صوبے میں فوج کی کارروائی میں 39 مسلح دہشت گرد ہلاک ہوئے اور فوج نے اسی کارروائی کے دوران سڑک کے کنارے لگے11 بموں کو برآمد کرکے ناکارہ بنا دیا۔ ان کا کہنا تھا کہ فوج نے بابل صوبے میں کارروائی کرتے ہوئے 25 دہشت گردوں کو موت کے گھاٹ کر دیا اور صوبے کے شمالی علاقے جرف صخر میں فوج نے دہشت گردوں کی10 گاڑیوں کو تباہ کر دیا۔
فوج کے ترجمان قاسم عطا کا کہنا ہے کہ سیکورٹی فورسز نے الانبار صوبے میں بھی کارروائی کرتے ہوئے 46 دہشت گردوں کو موت کے گھاٹ اتار دیا جبکہ اس کارروائی کے دوران ان کی دسیوں گاڑیوں کو تباہ کر دیا گیا۔ ان کا کہنا تھا کہ فوج اسی طرح الجزیرہ اور باديہ علاقوں میں بھی شدید کارروائی کر رہی ہے۔
عراقی فوج کے ترجمان کا کہنا ہے کہ سیکورٹی فورسز نے گزشتہ48 گھنٹے کے دوران صلاح الدین صوبے میں سبایكر چھاؤنی پر دہشت گردوں کے حملے کو ناکام بنا دیا اور اس کارروائی میں تمام حملہ آور مارے گئے اور ان کی گاڑیوں کو تباہ کر دیا گیا۔ ان کا کہنا تھا کہ ہلاک دہشت گردوں میں کئی عرب ممالک کے شہری بھی شامل ہیں۔
قاسم عطا کا کہنا تھا کہ دہشت گردوں کے ٹھکانوں پر فوج، فضائیہ کی مدد سے شدید حملے کر رہی ہے۔ انہوں نے اسی کے ساتھ مقامی قبائلي افراد کا فوج کی حمایت کرنے اور دہشت گردوں سے مقابلے پر شکریہ ادا کیا۔ صلاح الدین صوبے کے فوجی ذرائع کا کہنا ہے کہ دہشت گردوں نے تكريت شہر میں سبایكر چھاؤنی پر چھ جولائی کو حملہ کیا تھا جسے فوج نے ناکام بنا دیا اور دہشت گردوں کو بھاری نقصان ہوا۔
واضح رہے کہ عراق میں حالیہ دنوں میں دہشت گردوں نے کچھ شمالی علاقوں پر قبضہ کر لیا تھا جسے آزاد کرانے کے لئے فوج کی وسیع پیمانے پر کارروائی جاری ہے۔