یمنی مسلح افواج کی مأرب اور حضرموت میں وسیع کارروائیاں، سعودی حمایت یافتہ 58 جنگجو ہلاک

شیعیت نیوز : یمنی مسلح افواج نے ملک کے مختلف علاقوں میں سعودی حمایت یافتہ جنگجوؤں کے فوجی مراکز اور کمانڈ سینٹرز کے خلاف وسیع پیمانے پر کارروائیاں کرتے ہوئے متعدد اہداف کو نشانہ بنایا، جس کے نتیجے میں درجنوں جنگجو ہلاک اور زخمی ہوگئے۔ یہ کارروائیاں صوبہ مأرب کے علاقے الرویک اور صوبہ حضرموت کے اضلاع العبر، الثنیہ اور الودیعہ میں کی گئیں، جہاں بیلسٹک میزائلوں اور ڈرونز سے حملے کیے گئے۔

فرانسیسی خبر رساں ادارے اے ایف پی کے مطابق ایک سعودی فوجی ذریعے نے نام ظاہر نہ کرنے کی شرط پر بتایا کہ حالیہ حملوں میں کم از کم 58 سعودی حمایت یافتہ جنگجو ہلاک جبکہ درجنوں دیگر زخمی ہوئے ہیں۔ یمنی فوج کے ذرائع کا کہنا ہے کہ ان حملوں میں فوجی کیمپ، اسلحہ کے ذخائر اور بکتر بند گاڑیاں بھی تباہ کر دی گئیں۔

یہ بھی پڑھیں: جامعہ محمدیہ ٹرسٹ مہدی آباد میں دو روزہ فنِ تحقیق و تحریر ورکشاپ کا انعقاد

یمنی فوج کے مطابق پیشگی حملوں کی حکمت عملی کا مقصد سعودی حمایت یافتہ افواج کی عسکری تیاریوں کو ناکام بنانا اور مستقبل میں کسی بھی ممکنہ فوجی کارروائی کے وقت اور مقام کا تعین کرنے کی ان کی صلاحیت کو محدود کرنا ہے۔ دوسری جانب مأرب اور حضرموت کے گورنروں نے یمنی عوام کو دشمن کی صفوں میں شامل ہونے سے خبردار کرتے ہوئے اسے قومی مفادات کے خلاف قرار دیا۔