ایرانی بحریہ کا آبنائے ہرمز اور بحیرۂ عمان پر مکمل کنٹرول، ایڈمرل سیاری کا دفاعی صلاحیتوں پر اطمینان کا اظہار

شیعیت نیوز : ایرانی فوج کے معاون رابطہ کار ایڈمرل حبیب اللہ سیاری نے کہا ہے کہ ایران کی بحریہ مکمل دفاعی صلاحیت رکھتی ہے اور آبنائے ہرمز، شمالی بحرہند اور بحیرۂ عمان میں ایران کی اجازت کے بغیر کوئی نقل و حرکت ممکن نہیں۔ انہوں نے ایرانی بحریہ کی صلاحیتوں پر اطمینان کا اظہار کرتے ہوئے کہا کہ بحریہ اس وقت مضبوط پوزیشن میں ہے اور ایرانی افواج آبنائے ہرمز کے مشرقی حصے، شمالی بحر ہند اور بحیرۂ عمان پر مکمل نگرانی اور کنٹرول رکھے ہوئے ہیں۔

ایڈمرل سیاری نے کہا کہ ایرانی بحریہ کے اہلکار پورے عزم کے ساتھ مغربی ایشیا کے حساس سمندری علاقے میں اپنی ذمہ داریاں انجام دے رہے ہیں اور ان کی موجودگی کے باعث ان اہم آبی گزرگاہوں میں کسی بھی قسم کی نقل و حرکت ایران کی اجازت کے بغیر ممکن نہیں۔ انہوں نے مزید کہا کہ ملک کی زمینی، بحری اور فضائی سرحدوں پر سکیورٹی کی صورتحال مکمل طور پر مستحکم اور اطمینان بخش ہے، جبکہ مسلح افواج ہر قسم کے ممکنہ خطرات سے نمٹنے کے لیے پوری طرح تیار ہیں۔

یہ بھی پڑھیں: اسلام آباد میں رہبرِ شہید امت کی یاد میں پروقار تعزیتی و تکریمی تقریب، شیعہ و سنی علماء کا اتحادِ امت پر زور

ایرانی فوج کے معاون رابطہ کار نے کہا کہ آج مسلح افواج کو جو دفاعی طاقت اور صلاحیت حاصل ہے، وہ شہید امام خامنہ ایؒ کی ہدایات، تدابیر اور فکری رہنمائی کا نتیجہ ہے، جنہوں نے دفاعی خودکفالت اور قومی اقتدار کو مضبوط بنانے میں اہم کردار ادا کیا۔

واضح رہے کہ یہ بیان ایسے وقت میں سامنے آیا ہے جب عراق میں امریکی-سعودی جارحیت کے خلاف مزاحمت جاری ہے، یمن نے ریاض کو نشانہ بنایا ہے، اور خطے میں امریکی موجودگی کے خلاف مقاومتی قوتوں کا عزم بڑھ رہا ہے۔ ایرانی بحریہ کا آبنائے ہرمز پر کنٹرول عالمی تیل کی ترسیل کے لیے ایک اسٹریٹجک اہمیت رکھتا ہے اور اس بیان کو خطے میں ایران کی دفاعی خودمختاری کے اظہار کے طور پر دیکھا جا رہا ہے۔