دشمن کی معمولی سی غلطی بھی ایرانی قوم کے سخت ردعمل کا باعث بنے گی، ایرانی آرمی چیف

شیعیت نیوز : اسلامی جمہوری ایران کی فوج کے سربراہ میجر جنرل امیر حاتمی نے خبردار کیا ہے کہ اگر دشمن نے کوئی بھی غلطی کی تو اسے ایرانی قوم کے سخت ردعمل کا سامنا کرنا پڑے گا، جو اس کے لیے حالات کو انتہائی دشوار بنا دے گا۔

یونیورسٹی آف امام علیؑ میں نشان فداکاری کی چھٹی سالگرہ اور جنگ رمضان کے شہداء کے اہل خانہ کے اعزاز میں منعقدہ تقریب سے خطاب کرتے ہوئے جنرل حاتمی نے شہید آیت اللہ رئیسی اور دیگر شہدائے خدمت کو خراج عقیدت پیش کیا۔

انہوں نے کہا کہ ایران نے جنگوں میں ہمیشہ طاقت اور استقامت کے ساتھ اپنے ملک کا دفاع کیا، جبکہ دشمن کے اسٹریٹجک اہداف — جن میں ایران کو جھکانا، اسلامی جمہوریہ کا خاتمہ اور خطے کا نقشہ تبدیل کرنا شامل تھا — مکمل طور پر ناکام ہو گئے۔

آرمی چیف نے کہا کہ دشمن کو جنگ رمضان میں بری طرح شکست کا سامنا کرنا پڑا اور وہ جنگ بندی کی درخواست کرنے پر مجبور ہوا۔ آج ایران عالمی سطح پر پہلے سے زیادہ مضبوط اور اس کی سرحدیں پہلے سے زیادہ مستحکم ہیں۔

یہ بھی پڑھیں : دہشتگرد نیتن یاہو کی حماقت نے ایران کو فائدہ پہنچا دیا

میجر جنرل حاتمی نے کہا کہ ایران کی بحری، بری اور فضائی افواج نے مکمل تیاری اور طاقت کا مظاہرہ کیا، جبکہ دشمن ایران کے ساحلوں کے قریب آنے کی ہمت بھی نہ کر سکا۔ فضائی دفاعی نظام آخری لمحے تک فعال رہا اور دشمن کے ڈرونز کو مار گرایا گیا۔

انہوں نے زور دیا کہ ایران اپنی دفاعی صلاحیت اور ڈیٹرنس قوت میں مسلسل اضافہ کر رہا ہے اور مسلح افواج ملک کے دفاع کے لیے ہر وقت مکمل طور پر تیار ہیں۔ دشمن کی معمولی سی بھی غلطی اسے ایرانی قوم کے شدید غصے اور سخت ردعمل سے دوچار کر دے گی۔