پاکستانی سوشل میڈیا پر امریکی بیانیے کی ترویج، ڈاکٹر صابر ابو مریم کا بے باک تجزیہ

شیعیت نیوز : فلسطین فاؤنڈیشن پاکستان کے سیکرٹری جنرل ڈاکٹر صابر ابو مریم نے اپنے تازہ تجزیے میں پاکستانی سوشل میڈیا پر فعال ایک مخصوص طبقے کی فکری کمزوری کو بے نقاب کیا ہے جو نادانستہ یا دانستہ طور پر امریکی اور اسرائیلی بیانیے کا آلہ کار بن رہا ہے۔

ڈاکٹر صابر کے مطابق 7 اکتوبر 2023 کے بعد سے طوفانِ اقصیٰ، غزہ و لبنان میں نسل کشی، یمن پر حملے اور ایران پر مسلط کردہ جنگ جیسے اہم واقعات میں پاکستانی سوشل میڈیا پر ایک مخصوص طبقہ حقائق چھپانے اور دشمن کے موقف کو تقویت دینے میں مصروف رہا ہے۔ انہوں نے واضح کیا کہ بین الاقوامی سیاسیات سے نابلد افراد جب مغربی شخصیات کی یکطرفہ باتوں کو بغیر تحقیق کے آگے پھیلاتے ہیں تو وہ بیرونی طاقتوں کے ہاتھوں میں کھیلتے ہیں۔

ڈاکٹر صابر نے حالیہ ایران امریکہ مذاکرات کا حوالہ دیتے ہوئے کہا کہ پاکستان ایک ذمہ دار ثالث کا کردار ادا کر رہا ہے لیکن امریکہ نے مذاکرات کے دوران دھوکہ دہی سے کام لیتے ہوئے آبنائے ہرمز میں جنگی کشتیاں بھیجیں اور طے شدہ فریم ورک سے روگردانی کی۔

یہ بھی پڑھیں: عراقچی اسلام آباد پہنچ گئے، مذاکرات کا دوسرا دور شروع، ایران کے پاس تین بڑے عسکری آپشن بھی تیار

انہوں نے واضح کیا کہ ایران ایک مضبوط خودمختار ریاست ہے جس نے دہائیوں سے امریکی دباؤ کا سامنا کیا ہے اور چند ٹویٹس یا فیس بک پوسٹس سے اسے اپنے موقف سے پیچھے ہٹانے کا خیال محض خام خیالی ہے۔

ڈاکٹر صابر کا خلاصہ یہ ہے کہ پاکستان میں رائے سازی کو سنجیدگی، تحقیق اور ذمہ داری کے ساتھ جوڑنا ضروری ہے کیونکہ جب قومیں اپنی رائے کی بنیاد علم کے بجائے جذبات پر رکھتی ہیں تو وہ اپنے قومی مفادات کو بھی داؤ پر لگا دیتی ہیں۔