صدر ایران کا تعزیتی پیغام، علی لاریجانی کی شہادت پر گہرے رنج کا اظہار

شیعیت نیوز: مسعود پزشکیان نے اپنے عزیز، فاضل اور قدرمند بھائی علی لاریجانی کی شہادت پر گہرے رنج و افسوس کا اظہار کیا ہے۔ انہوں نے کہا کہ وہ ایک ممتاز اور باوقار شخصیت تھے جنہوں نے اسلامی جمہوریہ کے مختلف محاذوں پر وسیع اور متنوع خدمات انجام دیں۔

انہوں نے مزید کہا کہ مجلسِ شوریٰ اسلامی میں طویل عرصے تک ساتھ کام کرنے اور حالیہ دور میں قومی سلامتی کونسل کے سیکرٹری کے طور پر ذمہ داریوں کے دوران، لاریجانی میں ہمیشہ خیرخواہی، بصیرت، تعاون اور دوراندیشی نمایاں رہی۔

یہ بھی پڑھیں : تہران میں مشترکہ تشییع کا اعلان، علی لاریجانی اور غلامرضا سلیمانی شہداء میں شامل

صدر ایران کے مطابق بلاشبہ ان کا یہ فقدان پورا کرنا انتہائی مشکل ہے، تاہم برسوں کی مخلصانہ جدوجہد کا صلہ انہیں شہادت کی صورت میں ملا۔ انہوں نے کہا کہ ان کا خون تاریخ کے بدترین مجرموں کے ہاتھوں بہایا گیا، لیکن انقلابِ اسلامی کے عظیم شہداء کے ساتھ ان کی ہمجواری ان کی دیرینہ آرزو تھی۔

انہوں نے کہا کہ شہید لاریجانی، روح اللہ خمینی، علی خامنہ ای اور مرتضیٰ مطہری کے مکتب کے نمایاں تربیت یافتہ فرد تھے اور ان کی شہادت ان کی مسلسل جدوجہد کا انعام ہے۔

انہوں نے مزید کہا کہ حالیہ دہشت گردانہ حملوں میں ملوث عناصر کے لیے سخت ردعمل تیار ہے، جنہوں نے ایران کی مقدس سرزمین پر بہادر شہداء کا خون بہایا۔

صدر نے کہا کہ شہید لاریجانی نے اپنی آخری ذمہ داری کے طور پر قومی سلامتی کونسل میں مختصر مدت کے دوران خطے میں امن و استحکام کے فروغ، اسلامی ممالک کے درمیان ہم آہنگی اور بھائی چارے کے قیام کے لیے بھرپور کوششیں کیں اور بین الاقوامی سطح پر مزاحمت کے میدان میں نمایاں مقام حاصل کیا۔

انہوں نے یقین ظاہر کیا کہ اس نقصان کے باوجود استقامت، مزاحمت اور دوراندیشی کا راستہ جاری رہے گا اور ایرانی قوم کی کامیابی یقینی ہے۔

آخر میں انہوں نے اس شہادت پر حضرت بقیۃ اللہ الاعظمؑ، رہبرِ معظم انقلاب، شہید کے خاندان اور ایرانی قوم کو مبارکباد اور تعزیت پیش کی۔