غزہ: سیز فائر کے 108ویں دن قابض اسرائیلی فوج کی براہ راست فائرنگ سے 4 فلسطینی شہید، متعدد زخمی

شیعیت نیوز: منگل کی صبح قابض اسرائیلی فوج نے غزہ پٹی میں براہ راست فائرنگ کر کے چار فلسطینی شہریوں کو شہید کر دیا جبکہ متعدد دیگر زخمی ہو گئے۔ یہ واقعات سیز فائر معاہدے کے 108ویں دن پیش آئے جب قابض افواج نے زمینی خلاف ورزیوں کا سلسلہ جاری رکھا۔

طبی ذرائع کے مطابق غزہ شہر کے مشرق میں التفاح محلے کے بطش قبرستان کے قریب قابض اسرائیلی فوج کی فائرنگ سے چار فلسطینی شہید ہوئے۔ شہدا کے نام درج ذیل ہیں:

• محمود احمد لولو
• عبد القادر ابو خضر
• عبد الکریم غباین
• یوسف الریفی

اس حملے میں تین فلسطینی زخمی بھی ہوئے۔ قابض فوج نے نہ صرف براہ راست قتل کیا بلکہ بچوں کو بھی نشانہ بنایا اور مختلف علاقوں میں زمینی اور فضائی جارحیت جاری رکھی۔

یہ بھی پڑھیں: امریکہ میں احتجاج کے دوران ایک اور خاتون کا قتل: پولیس کی بربریت، جبکہ ایران پر انسانی حقوق کی بکواس جاری

گزشتہ روز پیر کو بھی غزہ پٹی میں قابض افواج کی فائرنگ سے تین فلسطینی شہید ہوئے تھے۔ انسانی حقوق کے حلقوں نے خبردار کیا ہے کہ یہ مسلسل خلاف ورزیاں سیز فائر معاہدے کو اس کے حقیقی مفہوم سے خالی کر رہی ہیں اور شہریوں کی جانوں کے تحفظ کے بجائے قابض فوج کو سزا سے بچنے کی پالیسی کو تقویت دے رہی ہیں۔

سیز فائر معاہدے کے نفاذ کے بعد سے اب تک قابض اسرائیلی افواج کی جانب سے کی گئی خلاف ورزیوں کے نتیجے میں 504 فلسطینی شہید اور 1331 زخمی ہو چکے ہیں۔

یہ معاہدہ 8 اکتوبر 2023ء سے شروع ہونے والی نسل کش جنگ کے خاتمے کا باعث بنا تھا جو تقریباً دو برس تک جاری رہی۔ اس جنگ میں 71 ہزار سے زائد فلسطینی شہید اور 171 ہزار سے زیادہ زخمی ہوئے جبکہ غزہ کا شہری بنیادی ڈھانچہ تقریباً 90 فیصد تباہ ہو گیا۔ اقوام متحدہ کے مطابق تعمیر نو کی لاگت کا تخمینہ تقریباً 70 ارب ڈالر لگایا گیا ہے۔