شہید جنرل قاسم سلیمانی کے ذریعے شروع ہونیوالی مقاومت کبھی نہیں رُکے گی، چینی ماہر

شیعیت نیوز: تہران میں چینی میڈیا گروپ کے آفس سیکرٹری لی جیانان نے کہا کہ 3 جنوری 2020ء کو ٹرمپ حکومت نے بغداد کے انٹرنیشنل ائیرپورٹ پر حملہ کیا اور عمداً جنرل قاسم سلیمانی کو شہید کیا۔

امریکہ نے اس کارروائی کے ذریعے اپنی علاقائی تسلط پسندانہ پالیسی کا خونین مظاہرہ کیا۔

لی جیانان نے ان خیالات کا اظہار اسلامی جمہوریہ ایران کی سرکاری نیوز ایجنسی (IRNA) سے خصوصی گفتگو میں کیا۔

اس موقع پر انہوں نے کہا کہ شہید قاسم سلیمانی کا قتل بین الاقوامی قوانین کی کھلی خلاف ورزی تھی۔

جنرل قاسم سلیمانی اپنی زندگی کے دوران انتہاپسند گروہوں کے خلاف جدوجہد اور علاقائی استحکام کے تحفظ کے لیے پرعزم تھے۔

یہ بھی پڑھیں: کراچی میں خودکش حملے کی سازش ناکام، کم عمر بلوچ بچی کو دہشت گردوں کے جال سے بچا لیا گیا

انہوں نے دہشت گردی کے پھیلاؤ کو روکنے میں نمایاں کردار ادا کیا، لیکن چونکہ وہ مغربی ایشیا میں امریکی تسلط پسندی کے پھیلاؤ کی راہ میں رکاوٹ تھے، اس لیے انہیں شہید کر دیا گیا۔

چینی ماہر نے زور دے کر کہا کہ امریکہ برسوں سے "جمہوریت” کا نام لے کر مغربی ایشیا میں مداخلت پسندانہ پالیسیوں پر عمل پیرا ہے، جس کے نتیجے میں تقسیم اور عدم استحکام پیدا ہوا ہے۔

انہوں نے کہا کہ امریکہ اور اسرائیل دھڑلے سے دوسرے ممالک کے داخلی امور میں مداخلت کرتے ہیں۔

لی جیانان نے کہا کہ امریکہ و اسرائیل نے خطے کی صورتحال بگاڑ کر، لبنان و یمن جیسے ممالک میں جنگ کو طول دیا اور لاکھوں افراد کو بے گھر کر دیا۔

یہ یکطرفہ رویہ اور طاقت پر مبنی سیاست، خطے کے ممالک و عالمی برادری کی وسیع پیمانے پر مذمت کا باعث بنی۔

انہوں نے ایران کے خلاف اسرائیل و امریکہ کی جارحیت کا ذکر کیا۔

اس بارے میں انہوں نے کہا کہ اس حملے نے ظاہر کیا کہ امریکہ و اسرائیل دوسرے ممالک کی خود مختاری کو خاطر میں نہیں لاتے اور نہ ہی خطے میں استحکام چاہتے ہیں۔

لیکن دباؤ اور جبر کبھی بھی مزاحمت کے عزم کو ختم نہیں کر سکتا۔

اپنی گفتگو کے اختتام پر لی جیانان نے کہا کہ گزشتہ برسوں میں ایران کے مزاحمتی اقدامات کبھی نہیں رکے۔

مستقبل میں بھی ایران، مغربی ایشیا میں منصفانہ مقاصد کی حمایت، بالخصوص فلسطینی عوام کے بنیادی حقوق کے دفاع میں اپنا کردار جاری رکھے گا۔

چینی ماہر نے ایرانی حکام کے اس بیان کی تائید کی کہ شہید جنرل قاسم سلیمانی نے مزاحمت کا جو بیج بویا تھا وہ اب جڑ پکڑ چکا ہے اور پھل دے رہا ہے۔

انہوں نے کہا کہ جب تک امریکہ و اسرائیل اپنی متشدد تسلط پسندی کو جاری رکھیں گے، اس وقت تک مغربی ایشیا میں مزاحمت کا وجود باقی رہے گا۔