پشاور میں سینیٹر خرم ذیشان کی رہائش گاہ پر حملہ قابلِ مذمت ہے، سینیٹر علامہ راجہ ناصر عباس جعفری

شیعیت نیوز: سینیٹر علامہ راجہ ناصر عباس جعفری، چیئرمین مجلس وحدت مسلمین پاکستان نے پشاور میں پاکستان تحریک انصاف کے سینیٹر خرم ذیشان کی رہائش گاہ پر حملے کی شدید مذمت کرتے ہوئے اسے انتہائی تشویش ناک قرار دیا ہے۔

انہوں نے کہا کہ یہ سن کر نہایت افسوس اور تشویش ہوئی کہ سینیٹر خرم ذیشان کی رہائش گاہ پر حملہ کیا گیا جس کے نتیجے میں ان کے دو ملازمین زخمی ہوئے۔ ان کا کہنا تھا کہ یہ بہیمانہ حملہ ملک میں سیاسی اختلافِ رائے کے لیے بڑھتے ہوئے خطرات کی سنگین علامت ہے۔

یہ بھی پڑھیں: کوہاٹ، ہنگو اور اورکزئی میں مجلس علمائے اہلبیت کی تنظیم سازی، تین نئے صدور کا انتخاب

علامہ راجہ ناصر عباس جعفری نے کہا کہ نہایت ضروری ہے کہ اس واقعے کی شفاف، غیر جانبدارانہ اور مکمل تحقیقات کی جائیں تاکہ ذمہ داران کو قانون کے کٹہرے میں لایا جا سکے۔

انہوں نے واضح کیا کہ ریاست کی بنیادی ذمہ داری ہے کہ ہر شہری کی جان، مال اور سیاسی مؤقف کی حفاظت کو یقینی بنائے، چاہے وہ کسی بھی جماعت یا نظریے سے تعلق رکھتا ہو۔ انہوں نے مطالبہ کیا کہ اس افسوسناک واقعے کا فوری نوٹس لیا جائے اور ایسے اقدامات کیے جائیں جو شہریوں کے تحفظ اور سیاسی استحکام کی ضمانت بن سکیں۔