جوہری ہتھیار کبھی ہمارا پروگرام نہیں تھا، پرامن جوہری توانائی قومی ضرورت ہے، ایرانی نائب صدر

شیعیت نیوز: ایران کے نائب صدر محمد رضا عارف نے ایک مرتبہ پھر واضح کیا ہے کہ اسلامی جمہوریہ ایران نے کبھی جوہری ہتھیار بنانے کا پروگرام نہیں بنایا اور نہ ہی یہ امر ایران کے قومی نظریے میں شامل ہے۔

انہوں نے کہا کہ ایران نے گذشتہ کئی دہائیوں کے دوران عملی طور پر ثابت کیا ہے کہ اس کا جوہری پروگرام مکمل طور پر پرامن مقاصد کے لیے ہے۔ مغربی ممالک نے ایران کے پرامن جوہری پروگرام کے حوالے سے جانبدارانہ رویہ اپنایا، تاہم اس کے باوجود ایران نے جوہری طب اور ریڈیو فارماسیوٹیکلز کے میدان میں نمایاں کامیابیاں حاصل کیں جو ان غلط الزامات کا بہترین جواب ہیں۔

نائب صدر نے ایران کے 20 ہزار میگاواٹ جوہری بجلی منصوبے کا حوالہ دیتے ہوئے کہا کہ مغربی ممالک نے سیاسی مقاصد کے تحت ایران کی جوہری سرگرمیوں کو غلط رنگ دیا، جبکہ حقیقت یہ ہے کہ ایران کا مقصد صرف توانائی کی ضروریات پوری کرنا ہے۔ 2041 تک جوہری بجلی کی پیداوار کو 20 ہزار میگاواٹ تک بڑھانا ایک ناقابلِ تردید قومی ضرورت ہے۔

یہ بھی پڑھیں: امریکہ کی ایران میں نظامِ تبدیل کی کوششیں ناکام ہوئیں، ٹام باراک کا اعتراف

انہوں نے زور دیا کہ جوہری ایندھن صاف اور محفوظ ترین توانائی کے ذرائع میں شامل ہے اور ایران کو مقامی صلاحیتوں کے تحت تیار کیے جانے والے بجلی گھروں کے منصوبوں کو پوری قوت کے ساتھ آگے بڑھانا چاہیے۔