اقوام متحدہ جنرل اسمبلی کا تاریخی فیصلہ: فلسطین کی حمایت میں پانچ قراردادیں بھاری اکثریت سے منظور

شیعیت نیوز: اقوام متحدہ کی جنرل اسمبلی نے جمعہ کے روز فلسطین سے متعلق پانچ اہم قراردادیں بھاری اکثریت سے منظور کر لیں، جو فلسطینی عوام کی حمایت، پناہ گزینوں کے حقوق اور اسرائیلی اشغال کے خلاف عالمی یکجہتی کی عکاسی کرتی ہیں۔

فلسطینی انفارمیشن سینٹر کے مطابق، پہلی قرارداد جو فلسطینی پناہ گزینوں کی امداد سے متعلق تھی، کو 151 ممالک کی حمایت حاصل ہوئی، 10 نے مخالفت کی جبکہ 14 نے غیر حاضری اختیار کی۔

دوسری قرارداد، جو فلسطینی پناہ گزینوں کے لیے اقوام متحدہ کے ادارہ یو این آر ڈبلیو (UNRWA) کی سرگرمیوں میں مزید تین سال کی توسیع سے متعلق تھی، 145 ووٹوں سے منظور ہوئی، 10 نے مخالفت کی اور 18 نے غیر حاضری اختیار کی۔

یہ بھی پڑھیں: ایرانی جزائر پر جھوٹے دعوے چھوڑ دو ورنہ ایرانی عوام کا صبر ٹووت جائے گا، امارات کو ایران کا آخری الٹی میٹم

تیسری قرارداد، جو فلسطینی پناہ گزینوں کی جائیداد اور اس سے حاصل ہونے والی آمدنی سے متعلق تھی، 157 ممالک کی حمایت سے منظور ہوئی، 10 نے مخالفت کی اور 9 نے غیر حاضری اختیار کی۔

چوتھی قرارداد، جو اسرائیلی اقدامات اور زیر قبضہ علاقوں میں فلسطینیوں اور دیگر عربوں کے انسانی حقوق پر اثرات کی تحقیقات کرنے والی خصوصی کمیٹی سے متعلق تھی، 88 ووٹوں سے منظور ہوئی، 19 نے مخالفت کی اور 64 نے غیر حاضری اختیار کی۔

پانچویں قرارداد، جس میں مقبوضہ فلسطینی علاقوں بشمول القدس شرقی اور مقبوضہ شامی گولان میں اسرائیلی بستیوں کی سرگرمیوں کی شدید مذمت کی گئی، 146 ووٹوں سے منظور ہوئی، 13 نے مخالفت کی اور 17 نے غیر حاضری اختیار کی۔

فلسطین کے مستقل نمائندہ اقوام متحدہ ریاض منصور نے رکن ممالک کی وسیع حمایت پر شکریہ ادا کرتے ہوئے کہا کہ فلسطینی عوام کے ساتھ عالمی یکجہتی مسلسل بڑھ رہی ہے، خاص طور پر پناہ گزینوں کے مسائل کے حوالے سے۔ انہوں نے کہا کہ یہ حمایت اس وقت انتہائی اہم ہے جب غزہ اور مغربی کنارے کے فلسطینی اسرائیلی جارحیت کا سامنا کر رہے ہیں۔