یونیفل کا بڑا بیان: حزب اللہ کی کوئی عسکری سرگرمی نہیں، اسرائیلی الزامات بے بنیاد ہیں
02 دسمبر, 2025 17:49
شیعیت نیوز: اقوام متحدہ کی امن فوج یونیفل نے اسرائیلی حکومت کی جانب سے حزب اللہ لبنان پر لگائے گئے الزامات کی سختی سے تردید کر دی ہے۔
تفصیلات کے مطابق، یونیفل کے ترجمان نے کہا کہ گزشتہ سال کے دوران امن قائم رکھنے والے علاقوں میں حزب اللہ کی جانب سے کوئی عسکری سرگرمی یا غیر قانونی کارروائی ریکارڈ نہیں کی گئی۔
یہ بیان ایسے وقت میں سامنے آیا ہے جب اسرائیل لبنان پر فضائی اور زمینی حملوں کا سلسلہ جاری رکھے ہوئے ہے، جس کی وجہ کے طور پر وہ حزب اللہ کی مبینہ عسکری سرگرمیوں کا حوالہ دیتا ہے۔
یہ بھی پڑھیں: فلسطینی فٹبالرز ICC میں فیفا یوفا صدارتوں پر مقدمہ کریں گے: اسرائیلی جرائم کی حمایت کا الزام
یونیفل کے ترجمان نے مزید بتایا کہ اقوام متحدہ نے لبنان میں اپنے اہلکاروں کی تعداد ۲۵ فیصد تک کم کرنے کا عمل شروع کر دیا ہے۔ اس کمی کی وجہ بجٹ میں کمی بتائی گئی ہے، اور توقع ہے کہ یہ عمل آئندہ سال کے اوائل تک مکمل ہوجائے گا۔
واضح رہے کہ یونیفل نے پہلے بھی کہا تھا کہ گزشتہ ۱۲ ماہ کے دوران اسرائیل نے لبنان کی فضائی اور زمینی حدود کی ۱۰,۰۰۰ سے زائد بار خلاف ورزی کی ہے۔
