حکومت پسنی میں امریکا کو بندرگاہ دینےکی فائنانشل ٹائمز کی رپورٹ پر وضاحت دے، سینیٹر علامہ راجہ ناصر عباس جعفری

شیعیت نیوز : چیئرمین مجلس وحدت مسلمین پاکستان سینیٹر علامہ راجہ ناصر عباس جعفری نے اپنے بیان میں کہا ہے کہ بطورِ رکنِ سینیٹ وہ حکومتِ پاکستان سے فوری اور دو ٹوک وضاحت کا مطالبہ کرتے ہیں کہ فائنانشل ٹائمز کی اس رپورٹ میں کتنی صداقت ہے جس میں دعویٰ کیا گیا ہے کہ پاکستان نے امریکہ کو پسنی بندرگاہ کے ایک ارب بیس کروڑ ڈالر مالیت کے ترقیاتی منصوبے کے لیے پیشکش کی ہے۔

انہوں نے کہا کہ یہ خبر نہ صرف پاکستان کے ایران اور چین جیسے قریبی اور اسٹریٹیجک شراکت داروں کے ساتھ تعلقات پر منفی اثر ڈال سکتی ہے بلکہ چین پاکستان اقتصادی راہداری سی پیک، جس کا مرکز گوادر ہے، کے لیے بھی شدید نقصان دہ ثابت ہو سکتی ہے۔

اگر ایسا کوئی منصوبہ واقعی زیرِ غور ہے تو یہ اقدام نہ صرف علاقائی امن و استحکام کو خطرے میں ڈالے گا بلکہ پاکستان کی خارجہ پالیسی کے بنیادی اصولوں سے بھی انحراف ہو گا۔

یہ بھی پڑھیں : گلگت بلتستان میں امریکہ مخالف شخصیات کی جانوں کو شدید خطرات لاحق ہیں، اپوزیشن لیڈر کاظم میثم

یہ معاملہ مزید سنگین اس لیے بھی ہے کہ یہ رپورٹ ایسے وقت میں سامنے آئی ہے جب ٹرمپ انتظامیہ کی جانب سے افغانستان میں بگرام ایئر بیس دوبارہ حاصل کرنے پر زور دیا جا رہا ہے، اور علاقائی حساسیتیں انتہائی بلند ہیں۔ سینیٹر راجہ ناصر عباس جعفری نے زور دیا ہے کہ حکومت فوری طور پر شفاف وضاحت دے، تاکہ تجزیہ کاروں اور عوامی سطح پر پھیلنے والے شبہات کا ازالہ ہو سکے۔