نماز دل کو سکون، ایمان کو عمق اور انسان کو عزم عطا کرتی ہے، رہبر انقلاب اسلامی

شیعیت نیوز : رہبر انقلاب اسلامی آیت اللہ العظمی سید علی خامنہ ای نے نماز کی بتیسویں قومی کانفرنس کے نام اپنے پیغام میں دنیا و آخرت میں انسان کی زندگی میں اس روحانی اور حیات بخش فریضے کے کردار کی طرف اشارہ کرتے ہوئے کہا ہے کہ نماز کی ترویج و تعلیم، دین کی تبلیغ کرنے والے اداروں، افراد اور دیندار لوگوں کی یقینی ذمہ داری ہے۔

🌿 پیغام کا متن:

بسم اللہ الرحمن الرحیم
و صلی اللہ علی محمد و آلہ الطاہرین

نماز کی کانفرنس ملک کی سب سے مفید کانفرنسوں میں سے ایک ہے اور جس دن یہ کانفرنس منعقد ہوتی ہے وہ دن سال کے سب سے مبارک دنوں میں سے ایک ہے۔ یہ چیز اسلامی واجبات کے درمیان اس روحانی اور حیات بخش فریضے کے تشخص اور نمایاں اہمیت کی وجہ سے ہے۔

جب نماز خشوع، معبود کی جانب قلبی توجہ وغیرہ جیسے اپنے آداب کے ساتھ پڑھی جاتی ہے تو دل کو پرسکون، عزم کو مستحکم، ایمان کو عمیق اور امید کو زندہ کر دیتی ہے۔ دنیا و آخرت میں انسان کا انجام ایسے ہی دل، ایسے ہی عزم، ایسے ہی ایمان اور ایسی ہی امید سے وابستہ ہے۔

یہ بھی پڑھیں : طوفان الاقصٰی کے ذریعے اسرائیل کی اصلیت دنیا کے سامنے واضح ہوئی، علامہ علی حسنین

یہی وجہ ہے کہ قرآن مجید اور دیگر مذہبی کتابوں میں نماز کی سفارش دیگر سفارشات سے کہیں زیادہ ہے اور یہی وجہ ہے کہ اذان میں نماز کو "خیرالعمل” یعنی سب کاموں سے بہتر بتایا گیا ہے۔

والدین، اساتذہ، اور معاشرتی رفقاء کا کردار نماز کے فروغ اور اس کی پابندی میں بنیادی اہمیت رکھتا ہے۔

تبلیغ کرنے والے ادارے، مذہبی شخصیات اور سبھی دیندار لوگ اسے اپنی یقینی ذمہ داری سمجھیں اور نماز کی تعلیم، ترویج، اور اس کی روحانی اثرانگیزی کو بیان کرنے کے لیے جدید ذرائع اور ترغیب انگیز وسائل سے فائدہ اٹھائیں۔

رہبر انقلاب اسلامی نے اپنے پیغام میں کہا:

"میں جناب قرائتی صاحب کا دل کی گہرائی سے شکریہ ادا کرنا ضروری سمجھتا ہوں جنھوں نے اس پھل دار پودے کو بویا اور یہاں تک پہنچایا ہے۔”

والسلام علیکم و رحمت اللہ
سید علی خامنہ ای
7 اکتوبر 2025