فلسطینی خون کی سوداگری نہیں ہونے دیں گے، سینیٹر علامہ راجہ ناصر عباس جعفری

شیعیت نیوز : مجلس وحدت مسلمین پاکستان کے چیئرمین سینیٹر علامہ راجہ ناصر عباس جعفری نے کہا ہے کہ فلسطینی خون کی کسی قسم کی سوداگری قبول نہیں کی جائے گی۔

ان کا کہنا تھا کہ اردن، متحدہ عرب امارات، انڈونیشیا، پاکستان، ترکی، سعودی عرب، قطر اور مصر کے وزرائے خارجہ کا مشترکہ بیان اس وقت تک نامکمل ہے جب تک وہ صاف اور دوٹوک الفاظ میں فلسطین کو ایک خودمختار ریاست کے طور پر تسلیم کرنے اور مشرقی یروشلم کو اس کا دارالحکومت قرار دینے کا مطالبہ نہیں کرتے؛ کسی بھی منصوبے کو قبول کرنا جو قبضے یا استحصال کو جائز قرار دے، امت مسلمہ کے ساتھ خیانت ہوگی۔

یہ بھی پڑھیں : ایرانی صدر کا دو ٹوک اعلان: دباؤ کے ذریعے ایران کو جھکانے کا خواب کبھی پورا نہیں ہوگا

انہوں نے کہا کہ پاکستان کو اپنے تاریخی مؤقف پر ڈٹا رہنا ہوگا اور انصاف کے بغیر کسی بھی ابراہیمی معاہدے میں شمولیت کے لیے دباؤ قبول نہیں کرنا چاہیے؛ یہ فلسطینی کاز سے غداری اور امت کے جذبات کے ساتھ کھلواڑ ہوگا۔

علامہ راجہ ناصر عباس نے عالمی برادری سے مطالبہ کیا کہ تقریباً 70,000 فلسطینیوں کی شہادت کے واقعات پر شفاف تحقیقات اور جوابدہی یقینی بنائی جائے اور اس قتل عام کے ذمہ داروں کو انصاف کے کٹہرے میں لایا جائے۔ یہ وقت امت مسلمہ کی وحدت اور اصولی موقف اختیار کرنے کا ہے؛ ہم کسی سودے، کمزوری یا مصلحت کو فلسطین کے مظلوم عوام کے خون پر غالب نہیں ہونے دیں گے۔